Nune’e, organizasaun Movimentu Universitáriu Timor-Leste (MUTL) sei organiza malu hodi asaun pasifika hasoru Parlamentu Nasionál hodi kontra desizaun sosa karreta foun no mós ezije atu dada lalais karreta tuan ne’ebé eis-deputadu sira sei uza.

Portavós MUTL, Abílio Soares Ximenes hatete, estudante universitáriu, sosiedade sivíl no povu tomak organiza malu ona hodi sai fileira ida atu halo manifestasaun hasoru PN atu anula sira desizaun sosa karreta foun.

Manifestasaun ne’e halo tanba Prezidente PN, Arão Noe de Jesus, promete atu foti hikas karreta Prado husi eis-deputadu lejizlatura datoluk hodi fahe ba deputadu eleitu sira atu uza, maibé polítika ida ne’e la realiza.

Kompromisu ne’ebé halo la realiza ona, depois hamosu fali hanoin atu sosa karreta foun ho osan tokon ba tokon ne’ebé laiha justisa ba sosiedade timoroan ne’ebé maioria sei moris kiak.

“Kada períodu sosa karreta luxu 65 ho hela de’it ho osan tokon $2 ba leten. Karik osan ne’e ita aloka hodi hadi'a eskola, saúde, dada bee moos ita salva ona povu na’in hira ona”, dehan nia iha Kampus UNTL, horisehik.

Abílio hatutan, preparasaun ba asaun pasifika ne’e prontu ona, tanba antes koordena ona ho parte Polisia Nasionál Timor-Leste (PNTL) atu halo seguransa ba asaun pasifika to’o remata.

Antes ne’e, halo manifestasaun maibé mosu konfrontasaun la'ós husi estudante sira, maibé konspirasaun husi ajente balun. Tanba ne’e, sei buka meius oinsá atu bele antesipa ida ne’e.

Asaun pasifika ne’e laiha terminasaun tempu, maibé sei para bainhira hetan ona solusaun ne’ebé manifestante sira hakarak.

Nia hatete, tuir regra manifestasaun nian tenke metru 100 dook husi edifísiu ne’ebé tarjetu ba, maibé sira sei uza autonomia kampus ne’ebé laiha problema hodi distánsia ne’ebé besik malu ho resintu PN nian.

Nune’e, MUTL mós konvida timoroan tomak karik sente desizaun PN nian ne’e afeta ba dezenvolvimentu, bele mai hamutuk hodi hakilar ezije direitu povu ki'ik sira nian.