“Kalan di’ak ba ita hotu, hodi Komando PNTL nia naran hakarak klarifika ba públiku katak informasaun ne’ebé sirkula publikamente kona-ba UEP hamutuk ho Dili atu halo operasaun hodi hapara aktividade hahu aban 27 marsu, ida ne’e LALOS,”dehan Komandu PNTL ne’e, iha nia  pajina facebook, horkalan.

Tanba ne’e, nia husu ba públiku atu hala’o atividade baseia ba resolusaun ne’ebé Governu fó sai no oras ne’e vigor hela.

“Obrigado wa’in e dala ida informasaun ne’ebé espaila ne’e HOAX”.

Molok ne’e Konsellu Ministru (KM) deside prolonga tan serka sanitária no konfinamentu obrigatóriu iha kapital Dili to’o oras 23:59 loron 2 fulan abril tinan 2021.

Bazeia ba rezolusaun governu lei númeru 12/2021, loron 8 fulan-marsu ne’ebé impoin serka sanitaria no konfinamentu iha munisipiu Dili, ho nia regras ne’ebé presiza atu halo tuir nafatin mak hanesan, fase lima bebeik, uza maskara, labele halibur malu, distansiamentu sosial kuaze metro 1.5 no labele sai bainhira la nesesariu, exeptu ba sosa hahan, pulsa ahi, ba funsionariu públiku ka privadu esensial ne’ebé atu hala’o servisu.

Iha fatin seluk, Komandante Polísia Nasionál Timor Leste (PNTL) Munisípiu Dili, Superintendente Xefe Henrique da Costa mós reforsa tan katak informasaun ne’ebé dehan bandu kareta ho motor halo movimentu ne’e lalos ka “Hoax”.

“Kareta ho motorizada halo movimentu ami tenke hapara depois husu atu ba ne’ebé? kuandu atu pasiar ka laiha razaun klaru ba movimentu, entaun ami haruka fila. Maibé karik justifika katak ba sosa hahan, ba Ospital, sosa pulsa, servisu, sira ne’e ami autoriza,”informa Komandante Henrique.

Komandante ne’e esplika, dala ruma ema balu mak interpreta sala, tanba mensajem ne’ebé viral halo ema hotu preokupa ne’e la’ós husi komandante Munisípiu Dili nomós la’ós husi Komandante Unidade Espesial Polísia (UEP).

Jornalista: Saturnina da Costa

Editor: Jose Sarito Amaral