Matebian saudozu ANTONINO CAETANO VILANOVA AMARAL “LAVAN-FALU’’ moris iha loron 15 fulan Maiu tinan 1977 iha VASSA HAMA-LAMAN knua MUAPUSSO iha tempo okupasaun Indonesia.
Saudozu hanesan oan mane mesak husi aman Saudozu CAETANO VILANOVA AMARAL MAURUSSO husi uma lisan POITIKAL no inan ANTONIA DA COSTA husi uma lisan UHU-LAPA FANAR.
Saudozu Antonino ne’e oan mane husi Ema luta na’in ida, maka Caetano Vilanova Amaral MAURUSSO, Assistente politiku Komite Reziaun husi 1979 to’o 1981. Iha tinan 1981, nia aman MAURUSSO nomeadu nudar Comisariu politiku Nasional no mate tanbá luta ba libertasaun Nasional iha Ailaran tinan 1989.
Husi luta no kontribuisaun sira mak, kondekoradu husi estadu Timor Leste ho ORDEM FALINTIL iha tinan 2007.
Iha prosesu luta, nia oan matebian Antonino moris mai sei hela hámutuk ho nia, no inan kontinua reziste iha ailaran maibe tanba presaun operasun militar Indonesia maka’as iha tinan 1977 iha setor Leste, ordem komando da luta husu ba populasaun iha Zona Norte SAKALU tuun mai rende.
Saudozu ho nia inan rende iha suku MEHARA.
Enkuantu, nia aman saudozu CAETANO sei kontinua reziste no ikus mai saudozu nia aman hetan kaptura husi militar Indonesia iha suku MEHARA iha tinan 1978. Saudozu hela ho nia inan no aman hela iha suku MEHARA ho idade tinan ida ho balun.
Ho orientasaun Komando da Luta atu habelar Rede KLANDESTINA iha suku Com no kontinua habelar to’o iha suku Parlamentu no suko Pairara. Saudozu nia aman deside muda husi suku Mehara mai hela permanente iha nia knua Muapusso.
Iha Tinan 1979 Militar Indonesia husi Bataleaun 745 halo operasaun konjunta iha kalan bo’ot mai ataka aldeia Muapusso. Resultadu operasaun ne’e sira kaptura ema no halo torturasaun no oho membro klandestina balun. Haree ba asaun brutalismo ne’e saudozu nia aman CAETANO VILANOVA hola inisiativa halai ses husi familia ba ailaran hamutuk ho rezistensia maske Saudozu Antonino foin halo tinan rua.
Konsekuensia asaun ne’e Saudozu hamutuk ho nia inan ne’ebé sei gravida desterra obrigatoriu husik sira nia knua Muapusso hamutuk ho populasaun tomak mai hela iha detensaun preventiva iha suku Com.

Saudozu hanesan sobrevivente ba libertasaun nasional hamutuk ho nia inan sente la seguru tanba moris ho presaun psikolojika oioin husi militar indonesia.
Iha okaziaun ida ho vizita BUPATI CLAUDIO VIEIRA mai iha suku Com. Saudozu nia inan Antonia da Costa aprezenta nia situasaun moris ne’ebé inseguru tanba iha persegisaun maka’as.
Saudozu hamutuk ho nia inan ne’ebé sei gravida desterra ba iha Lospalos durante fulan ida hela iha Kodim Lospalos.
Ikus liu, Saudozu hamutuk ho nia inan ba iha suku Mehara ho razaun atu asegura vida moris hodi hela permanente ho nia familia iha suku Mehara.
Saudozu kontinua moris sobrevivente hamutuk ho nia mama hela iha suko Mehara to’o nia vida infansia hamutuk ho nia mama seim sente domin husi nia papa.
I. KARREIRA AKADEMIKA
Saudozu Hahú Nia Nivel Edukasaun Infansia:
1. Iha tinan 1986 to’o 1991, Saudozu hahú tama Eskola Primária no 2 Mehara;
2. Iha tinan 1992 to’o 1994, Saudozu kontinua estudo iha Escola Pre-Secundaria St. Domingos Savio Mehara;
3. Iha tinan 1995 to’o 1998, kontinua nia Estudu iha Escola Tecnico Vocasional Agricola Dom Bosco Fuiloro, ho situasaun ne’ebé defisil tebes Saudozu labele kontinua nia estudo iha nivel universidade tamba ekonimia la-permite.

II. ESTADU SIVIL
Saudozu hahú forma família iha tinan 2002 ho nia kaben Ijilda dos Santos Soares; Liu husi kazamento Matrimonio ne’e Maromak haraik grasa domin ho oan na’in 9, kompostu husi mane na’in 6 no feto na’in 3 no mós iha nia bei-oan mane ida.

III. KAREIRA PROFESIONAL
1. Iha tinan 2003 to’o 2005 saudaso halao kna’ar iha Igreja Nossa Senhora De Fatima Mehara Nu’udar Katekista Auxiliar;
2. Iha tinan 2006 to’o 2007, Saudozu hahú servisu iha Diresaun Nasional do Meio Ambiente hanesan Funsionario kazual;
3. Iha tinan 2007 to’o 2011 muda nia servisu husi Diresaun Nasional do Meio Ambiente iha nivel Nasional ba iha Munisipio Lautem nudar Pontu Fokal do Meio Ambiente Munisipio Lautem;
4. Iha loron 1 fulan juñu tinan 2011 to’o hakotu iis, Saudozu hetan fiar husi Diresaun Nasional do Meio Ambiente nu’udar Koordenador do Meio Ambiente Munisipio Lautém ho kategoria nivel administrativo grau E;
5. Iha tinan 2013, Saudozu hetan oportunidade hodi ba partisipa iha formasaun profissional iha Indonésia no hetan terseira klassifikasaun. Aleinde, ne’e saudozu mós hetan formasaun professional sira seluk iha rai laran.

IV. SAUDOZU NIA PARTISIPASAUN BA LUTA
Saudozu ativamente involve iha rede organizasaun rejistensia bainhira sei kontinua nia estudu iha Kolegio Dom Bosco Fuiloro, hahú husi tinan 1993- 1999.
Saudozu ativamente involve iha orgqnizasaun FOK-Falintil (faluk oan kiak Falintil).

V. INVOLVIMENTO ORGANIZASAUN POLITIKA
1. Iha tinan 2007 to’o 2016 asume nia knaar hanesan membro CPSD (Comisaun Politico Sub Distritu Tutuala) iha Partido Fretilin;
2. Iha tinan 2012 to’o 2021 nudar Membro CPD (Comisaun Politico Distritu Lautém) Fiskalizasaun iha Partido Fretilin.