Tuir Ministra Saúde, Odete Maria Freitas Belo, hatete, loron ida ne’e importante tebes ba parteira sira no mós medíku no enfermeiru sira.
“Husi 1.016 ne’ebé iha ne’e, ha’u espera katak, imi hotu sai parteira, ba alin sira ne’ebé tur iha ne’e ita bo’ot sira la’os parteira, maibé it abo’ot sira prepara atu sai parteira,”dehan nia iha CCD, kinta ne’e (05/05).
Iha oportunidade ne’e MS, hato’o, parabens ba profesinal saúde sira atu nafatin hatudu sira nia responsabilidade no abilidade hodi fó atendimentu ba inan isin rua sira.
"Ha'u nia agradese ba Maginifiku Reitor ho ninia estrutura tomak, ne'ebé fó importansia ba loron internasional parteira ne'e, tanba siensia ba parteira sira, iha mós infermeirus sira, nune'e mós ohin loron universidade ida ne'e mós selebra loron parteira nian, ita boot sira mós sei hanesan parteira," tenik nia.
Iha Fatin hanesan Prezidente Asosiasaun Parteira Timor- Leste, Lidia Gomes, hatete, ida ne’e selebrasaun ba tinan 100, progresu konfederasaun internasional loron ba parteira iha mundu tomak, agora nasaun ne’e mós sai hanesan membru, entaun Timor tenki selebra hamutuk ho parteira sira ne’ebé mak iha Timor-Leste.
“Ita haree ba progresu durante ne’e parteira sira servisu makaas duni ho ninian dedikasaun no ho responsabilidade, tanba ne’e, mak progresu ne’e hatun ona taxa mortalidade, ne’e uluk 550 resin, agora hatun ona ba 218/100 mil nasidus vibus no mós ba labarik sira mós tuun ona 45 mil nasidus vibus,” dehan nia.
Nia hatutan, total parteira iha Timor laran tomak nee hamutuk 822, ne’ebé servisu iha fasilidade saude hotu, inklui Hospital Nasional Guido Valadares (HNGV) no hospital referal sira.
Entretantu, Reitor Magnifiku Reitor UNTL, João Soares Martin hateten, UNTL iha fakuldade medisina siensia saúde, hamutuk ho Ministériu Saúde, selebra loron 100 ba parteira sira no mós konfederasaun parteira mundial.
"UNTL sente orgullu, hanesan Institutu Ensinu Superior mak halo formasaun ba parteira sira iha Timor-Leste, nune'e loron ne'e importante tebe-tebes, ba ita atu bele selebra no ao mesmu tempu halo mós reflesaun ba saida mak ita atinje ona, no saida mak ita presiza hodi halo ba oin," katak nia.
Reitor ne'e dehan, kada tinan UNTL produz parteira hamutuk na'in 470, bainhira estabelese fakuldade medisina hodi forma estudante sira, hodi tuir kursus parteira nian, atu nune'e iha futuru bele sai parteira hodi halo atendementu saúde públiku.
