“Ami husu ba ema hotu, atu foti medida preventiva ida, liu husi hamoos ita nia uma laran, fatin ne'ebé susuk tolun bá no mós uza roupa ne'ebé bele taka parte barak husi ita nia isin lolon hanesan, faru liman naruk no kalsa naruk,”dehan nia iha konferensia imprensa, iha salaun City8, Manleuan, Dili, tersa ne’e (18/01).

Aleinde, halo mós prevensaun ba komunidade sira liu husi asaun sira hanesan, fumigasaun no abatizasaun husi Ministeriu Saude, nune’e bele proteje-an husi moras dengue ne’ebé mai husi susuk Aedes aegypti. Tanba, dengue bele rejulta ema moras todan no bele sai ameasa ba ema nia vida.

Enkuantu, MS mós rekoñese, to'o ohin loron seidauk iha tratamentu ne’ebé diak ba moras dengue, maibé husu ema hotu atu halo prevensaun ba ida-idak nia-an liu husi asaun preventiva sira.

Iha fatin hanesan, Xefi Promosaun no Eduksaun Saúde, Misliza Vital, hatete, dengue sai problema boot iha nasaun Timor-Leste, tanba ne’e apela ba Ministeriu relevante sira, Lider komunitaria, Diretor eskola no mós voluntariu saúde sira atu halo limpeza iha fatin sira ne’ebé susuk moris bá ka bairu ne’ebé kazu dengue rejista as iha ne’ebá, maizumenus kada semana dala ida ou bele loron-loron.

Entretantu, tuir dadus husi Ministeriu Saúde liu husi Diresaun Depertamentu Vijilansia Epidemolojia, hahú husi loron 1 to’o 18 Janeiru 2022, rejista ona kazu dengue sa’e ba 521 no óbitu na’in sia (9).

Husi númeru kazu 521 ne’e, maioria kazu deteta iha Dili ho kazu 371, Ermera ho kazu 50, Baukau ho kazu 25, Manatuto ho kazu 23, Kovalima ho kazu 19, Manufahi ho kazu 14, Bobonaro ho kazu hitu, Ainaro ho kazu haat, Vikeke ho kazu haat, Likisa ho kazu tolu no Aileu iha kazu ida.

Nune’e, kazu óbitu na’in sia (9) ne’ebé relata, iha Dili na’in ida, Ermera na’in haat, Ainaro ida, Bobonaro ida no Kovalima iha na’in rua.

Asistente Editor: Saturnina da Costa