Portavós MUTL, Marçal dos Santos Pereira hatete, sira kontra desizaun Konsellu Administrasaun Parlamentár ne’ebé deside ona atu sosa karreta foun ho marka Pajero.

“Ami prontu atu fakar raan hodi defende injustisa sosiál iha nasaun ne’e”, dehan nia, iha Kampus Sentrál UNTL, horisehik.

MUTL konsidera desizaun PN atu sosa karreta 48 ba deputadu sira ne’e hanesan injustisa sosiál, tanba haree ba povu barak sei moris kiak.

Ne’e duni, husu ba reprezentante povu sira atu utiliza osan hirak ne'ebé aloka ba sosa viatura foun ne’e ba setór importante sira atu uza hodi dezenvolve povu nia moris.

Kada períodu, PN sempre sosa karreta foun ho folin ne’ebé karun tebes maibé to’o ikus halo leilaun ho folin ne’ebé baratu maski karreta hirak ne’e nia kondisaun sei di'ak.

Karreta Prado tuan hirak ne’ebé durante ne’e eis-deputadu Lejizlatura datoluk uza lori ba uma seidauk entrega, husu atu lori hikas mai hodi entrega ba deputadu eleitu sira atu uza ba servisu.

Ne’e duni, sira mós fó prazu tempu atu entrega durante loron tolu nia laran (23-25/10), bainhira la entrega maka iha Sesta (26/10) grupu ne’e sei halo manifestasaun.

Iha fatin hanesan membru MUTL, Noe Bernardino Ximenes hatete, osan ne’ebé atu sosa karreta foun ba deputadu sira ne’e tokon $2,6. Karik osan ne’e mak aloka hodi halo dezenvolvimentu ba postu administrativu povu sira bele moris di'ak.

“Ami sei kontra desizaun PN nian, ami sei la hakiduk. Saida mak atu akontese mai ami importante mak ukun na’in sira respeitu povu nia direitu”, dehan nia.

Leilaun Prado Fó Reseita Ba Estadu

Hataan ba kestaun ne’e, Prezidente PN Interina, Maria Angelina Sarmento hatete, planu sosa karreta foun ba deputadu sira ne’e hahú kedas iha Lejizlatura datoluk nian.

Karreta Prado tuan ne’ebé eis-deputadu sira seidauk entrega, halo ona tentativa barak maibé seidauk. Tanba ne’e, sei kontinua halo aprosimasaun nafatin to’o hetan solusaun.

Nia hatete, karreta tuan balun ne’ebé entrega Lejizlatura dahaat PN atribui ba deputadu sira ne’ebé laiha transporte, maibé tama ba Lejizlatura dalima Karreta hirak ne’e nia prazu tinan neen ona tama ba leilaun.

“Leilaun ne’e buat di'ak tanba liu husi ne’e bele hatama reseita mai Estadu, maibé depende ba polítika leilaun ne’e atu loke ba públiku ka ba deputadu sira”, dehan nia.

Deputadu sira deside halo leilaun ne’e tanba durante tinan hira nia laran sira uza karreta ne’e kuandu mákina ruma aat sira rasik mak halo manutensaun ho osan privadu. PN halo manutensaun ne’e ba hanesan troka oli de’it, tanba ne’e tama ba prosesu leilaun sira mak tuir konkursu ne’e.

Nia hatete, to’o oras ne’e Governu seidauk hatuur padraun loloos atu deside diretór, ministru no deputadu sira sa’e karreta tipu saida. Karik ne’e iha ona bele la’o tuir.

“Públiku sira kestiona mak deputadu sira de’it, maibé iha ministériu balun diretór sira mós sa’e hela karreta Prado ema la kestiona, enkuantu deputadu sira ne’e eleitu husi povu, sira iha direitu ba ida ne’e”, tenik Angelina.

Nia hatete, iha ministériu balun diretór barak mak sa'e karreta Prado no iha PN rasik liu husi Konsellu Konsultivu Fundu Petrolíferu (KKFP) mós sa’e hela karreta Prado, nusa mak sosiedade la kestiona.

Direitu Halo Manifestasaun

Kona-ba planu asaun pasifika husi MUTL, Presidente Interina PN hatete, Konstituisaun garantia ba ema hotu-hotu atu hala’o manifestasaun hodi hato’o nia espresaun ba buat ne’ebé sira la satisfás.

Dala ruma sira la entende didi'ak lala’ok sistema Estadu, ne’ebé prosesu leilaun ne’e di'ak bainhira haree karreta sira laiha ona kondisaun.

Karik Estadu sosa karreta foun ho folin ne’ebé ki'ik, maibé kontinua ho karreta tuan halo manutensaun kuaze folin atu hanesan ho osan ne’ebé atu sosa karreta foun. Ne’e tenke halo komparasaun atu haree ne’ebé razoavel.

Karreta tuan sira ne’e iha tarjetu atu entrega hafoin karreta foun sira tama mai, maibé ne’e depende ba negosiasaun Sekretáriu Jerál PN nian.