Tuir komunikadu ne’ebé Online INDEPENDENTE asesu, kuarta ne’e (27/07), iha pajina ofisial MTKI nian, relata, progresu distribuisaun sesta bázika ne’ebé lansa husi Ministru Turismu Komérsiu no Indústria José Lucas do Carmo da Silva, hahú iha aldeia Baia-Leste, Suku Komoro, iha loron-17 fulan-juñu tinan-2022, to’o ohin loron distriui ona ba iha suku haat, hanesan Suku Poetete iha Munisípiu Ermera, Suku Ritabou iha Munisípiu Maliana no Suku Dato iha Munisípiu Likísa.
Tuir dadus populasaun sira ne’ebé benefisia ona sesta bázica hanesan, Suku Komoro iha Aldeia Baia-Leste, Fomento I-II-III, Naroman no Golgota hamutuk benefisiáriu 14.665 husi uma kain 3.032 mak simu ona.
Suku Poetete Munisípiu Ermera iha aldeia 12 ho totál benefisiáriu hamutuk 11.768 husi uma kain 2.290.
Aleinde, Suku Ritabou Munisípiu Bobonaro ho benefisiáriu 3.352 husi uma kain 680 mak simu ona, no Suku Dato Munisípiu Likísa, benefisiáriu hamutuk 6.479 husi uma kain 1.482 maka simu ona sesta bázika.
Husi suku haat ne’e, suku Poetete distribui husi kompaña Betuhei, suku Ritabou husi kompaña Bobolait, Suku Komoro aldeia Baia-Leste, Fomento I to’o III no, aldeia Naroman no Golgota distribui husi kompaña Leader Lda.
Enkuantu, Suku Dato distribui husi kompaña Hanaroman Brilliant Lda.
Durante distribuisaun sekretariadu tékniku sesta bázika MTKI hetan kolaborasaun husi instituisaun estadu, hodi halo monitorizasaun ba prosesu distribuisaun mak hanesan, Komisaun Anti Korupsaun (KAK), Provedoria Direitus Humanos no justisa (PDHJ), AIFAESA, IP no ekipa monotirazasaun no avaliasaun husi MTKI.
Entretantu, instituisaun relevante sira hala’o avaliasaun no monitorizasaun iha terrenu deskobre katak, presiza hadi’a nafatin iha prosesu distribuisaun.
Nune’e, Sekretariadu sesta bázica no instituisaun monitorizasaun no prevensaun sira fó hanoin ba malu oinsá hadi’a regulamentu no regras produtu antes distribui ba komunidade sira tuir direitu ne’ebé mak regula ona.
Ho nune’e, implementasaun programa sesta bázika faze daruak, bazeia ba Dekretu lei nú. 10/2022 de 04 de março.
Tanba ne’e, Ministériu Turismu Komérsiu no Indústria, no Sekretária Estadu Koperativa (SEEKOP) nuudar instituisaun implementador programa sesta bázika, no mós iha kordenasaun husi Ministeriu Kordenasaun Asuntu Ekonómiku (MKAE).
