Ministru Prezidensial Konsellu Ministru, Fidelis Leite Magalhães, hatete, programa merenda eskolár nudar subsídiu ida ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loron-loron ho hahan ne’ebé saudavel, ekilibrada no indispensavel ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulá.

Nune’e, hodi integra ba rede públika ne’ebé situa iha rai-laran, hodi promove ninia prosesu ensinu no aprendizajen.

“Iha programa ne’e, sei fornese hahan ba alunu sira estabelesimentu edukasaun pré-eskolár no ensinu báziku, públiku no partikulár ne’ebé integra iha rede públika oferta servisu públiku nian, ne’ebé situa iha rai-laran,”dehan nia, iha Palasiu Governu, kuarta ne’e (27/07).

.Governante ne’e hatutan, subsídiu sira ne’ebé fó iha programa ida-ne’e maka, iha natureza subvensaun públika sira no asume ho forma subsídiu alimentár, ne’ebé hatoó espesiál ba sosa hahan ka subsídiu administrativu, ne’ebé ho objetivu atu suporta despeza sira ho enkargu administrativu sira impaktu husi ezekusaun programa ne’e.

Entretantu, implementadór sira programa merenda eskolár mak, estabelesimentu edukasaun pré-eskolár nian no ensinu báziku, públiku no partikulár ne’ebé integra iha rede públika oferta servisu públiku nian, ne’ebé nia fatin iha territóriu nasionál no organizasaun komunitária sira, grupu komunitária sira ka hanesan, liuliu asosiasaun sein personalidade jurídika.

Enkuantu, montante subsídiu ne’ebé atribui iha ámbitu programa merenda eskolár fiksa iha dolar amerikanu $0,42 centavus ba kada loron hanorin no ba kada alunu.