Diretór Jerál MTK, Gaspar de Araujo informa, MTK prepara ona orsamentu subsídiu kombustivel hodi implementa iha tempu badak nia laran.

"Ami hasai ona Dekretu Lei Ministériu ida par atu realiza, neste momentu ha'u prepara hela despaixu ministru nian par atu implementa duni (subsidiu) husi 2 Maiu, fulan ida ne'e, to'o 31 Jullu," dehan nia ba Jornalista jornal INDEPENDENTE via telephone, Kuarta (18/05).

Nia dehan, transporte públiku sira hanesan bus, taxi, mikrolete, angguna, travel no seluk tan ne'ebé dokumentus sei válidu iha direitu atu simu subsídiu.

Maibé, nia hatutan, ba sira ne'ebé dokumentu mate liu fulan tolu sei laiha direitu ba subsidiu kombustivel.

Tuir regra, nia hatete, transporte ida sei simu voucer mina litru lima nian kada loron.

“Loron ida litru 5, fulan ida hetan litru 150 no fulan tolu litru 450, maibé ba aero no maritima sei haree tuir nia viazen,” dehan nia.

Ba orsamentu ne’ebé MTK prepara ba subsidiu kombustivel ne’e, nia dehan, hamutuk millaun $2.8.

Tuir dadus, transporte públiku iha Timor-Leste laran tomak ne’ebé iha direitu ba subsidiu kombustivel hamutuk 4.129.

Transporte hirak ne’e sei simu subsidiu kombustivel sura husi 2 Maiu to'o 31 Jullu tinan ne’e.

Tuir planu, MTK sei fahe uluk vouche fulan Maiu nian hafoin sei fahe fulan Juñu no Jullu nian.