Liu husi komunikadu ne’ebé jornal INDEPENDENTE asesu, horseik, informa PR Lú Olo promulga ona Dekretu Parlamentu Nasionál Lei númeru 62/V-alterasaun dahuluk ba Lei númeru 1/2022, 3 Janeiru kona-ba Orsamentu Jerál Estadu ba 2022 no kriasaun Fundu Kombatentens Libertasaun Nasionál.
“Orsamentu Jerál Estadu ba tinan 2022 aprovadu ho Lei númeru/2022, 3 Janeiru. Maibé haree ba situasaun ekonómika internasionál no aumentu substansiál tasa inflasaun nian, sai nesesáriu ba estadu foti medidas hamenus impaktu ekonómiku hodi antisipa liuhusi dotasaun orsamental atu finansia sasukat sira,” informa komunikadu husi palasiu PR ne’e.
Bazeia Lei ne’e, durante tinan-2022, Governu autorizadu bele foti transferénsia husi Fundu Petrolíferu to’o montante US $ 2.552.598.015.
“Lei ne’e harii Fundu ba Kombatentes Libertasaun Nasionál ho finalidade finansia programa apoiu ba Kombatentes Libertasaun Nasionál iha área sosial, edukasaun, saúde, empregu, asesu ba kréditu no atividade ne’ebé manán rendimentu.”
Entretantu, iha oras balun hafoin aprovasaun final global ba Orsamentu Retifikativu ho montante billaun $1.241.210.748, Parlamentu Nasionál haruka ona proposta refere ba Prezidente Repúblika, Francisco Guterres Lú Olo hodi foti desizaun.
Prezidente Parlamentu Nasionál, Aniceto Guterres informa, iha 11 Maiu, PN aprova ona OR no hafoin komisaun C halo redasaun final, iha loron ne’e kedan PN haruka ona ba PR Lú Olo.
“Horseik (horibainrua) plenária Parlamentu Nasionál aprova tiha (OR) depois komisaun C hala’o nia kna’ar rezolve trata redasaun finál, trata hotu ona, horseik (horibainrua) envia kedas. Ita hein Prezidente Republika bele promulga iha tempu badak,” dehan Aniceto iha Parlamentu Nasionál, Kinta (12/05).
Tuir konstituisaun, nia hatutan, PR iha tempu masimu loron 20 atu estuda hodi foti desizaun.
“Maibé dala-ruma Prezidente Repúblika ohin haruka (proposta lei OR), aban bele promulga, tanba loron 20 la signifika to'o loron 20 mak nia foin bele promulga,” dehan nia.
Entretantu, iha 11 Maiu, PN aprova ona iha finál globál Proposta Lei númeru 38/V (4ª) kona-ba Alterasaun Dahuluk Lei númeru 1/2022, 3 Janeiru, Orsamentu Jerál Estadu 2022, ho montante totál bilaun $1.241.210.748.
Ho aprovasaun OR ne’e halo mudansa iha dotasaun orsamentál. Reseita Globál konsolida sa’e ba $3.348.070.979, enkuantu Despezas Globál konsolidada sa'e ba $3.347.457.179.
Orsamentu orgaun no servisus administrasaun sentrál hetan aumentu $1.241.210.748 no ninia totál sa’e ba $3.100.688.695 ne’ebé fahe tuir kategoria klasifikasaun ekonómiku hanesan Transférensia Públikas $1.950.982.687, Bens no Servisus $467.077.382, Kapitál Dezenvolvimentu $390.177.399, Saláriu no Vensimentu $250.537.130, no Kapitál Menór $41.914.097.
Atu finansia OR, Parlamentu Nasionál mós autoriza Governu atu halo levantamentu husi Fundu Minarai ho montante billiaun $2.55. Transferénsia liu Rendimentu Sustentável Estimadu billiaun $1.99.
