MSSI-WPF Fornese Aihan ba Vitima Afeitadu El Niño Na’in Rihun 18 Resin Featured

By Ekipa INDEPENDENTE Jullu 02, 2024 572
Ministeriu Solidariedade Sosial no Inkluzaun hamutuk ho Programa Ai-han Mundial (WFP-Sigla Inglés) apoia aihan ba ema vulneravel sira iha teritoriu Timor-Leste ne'ebé afetadu ba El Niño. Foto:Media WFP. Ministeriu Solidariedade Sosial no Inkluzaun hamutuk ho Programa Ai-han Mundial (WFP-Sigla Inglés) apoia aihan ba ema vulneravel sira iha teritoriu Timor-Leste ne'ebé afetadu ba El Niño. Foto:Media WFP.

DILI: Ministeriu Solidariedade Sosial no Inkluzaun hamutuk ho Programa Ai-han Mundial (WFP-Sigla Inglés) apoia aihan ba ema vulneravel na'in 18.600 iha teritoriu Timor-Leste ne'ebé afetadu ba El Niño.

Tuir komunikadu ne’ebé Online INDEPENDENTE asesu, hahu ohin no durante fulan tolu nia laran, governu Timor-Leste, liu husi Ministeriu Solidariedade Sosiál no Inkluzaun, Autoridade Protesaun Sivil, no liña ministérial sira seluk, no suporta hosi Programa Ai-han Mundial, sei fornese asisténsia ai-han ba ema vulneravel sira ne'ebé afetadu husi El Niño.

Aleinde ne'e, sei fahe mós ai-han nutritivu espesializadu ba feto isin-rua no fó-susu atu prevene malnutrisaun.

Ministra Solidaridade Sosiál no Inkluzaun Veronica das Dores hateten, asisténsia ne'e tarjetu ba ema sira ne'ebé afetadu liu husi El Niño iha postu administrativu 32 iha munisípiu Bobonaro, Covalima, Ermera, Lautem, Likisa no Manufahi. Ida ne'e inklui apoiu ba aprovizionamentu, transporte, no mós entrega tonelada 720 husi produtu oioin hanesan, fos, koto, mina te’in.

“Intervensaun ida-ne'e importante tebes atu garante protesaun no seguransa ai-han ba ema ne'ebé presiza iha munisípiu neen ne'ebé afetadu husi El Niño. Ami-nia esforsu koordenadu ho PAM/WFP asegura katak populasaun sira ne'ebé vulneravel liu atu simu asisténsia ne'ebé sira presiza durante iha tempu defisil ne’e nia-laran,”dehan Ministra Veronica, iha Komunikadu ne’ebé Online INDEPENDENTE sita.

Aleinde ne'e, ai-han nutritivu espesializadu, sei fornese ba feto isin-rua no fó-susu feto no labarik-feto sira na'in rihun ida (1.000) ne'ebé iha risku aas ba malnutrisaun aguda.

Asisténsia ida-ne'e aliña ho planu nasionál governu nian atu prevene malnutrisaun no sei fornese ba feto sira ne'ebé elijivel iha uma-kain sira ne'ebé simu asisténsia hanesan sasán, servisu no materiál, ka asisténsia la'ós monetaria/osan).

Aprosimasaun ida-ne'e ho objetivu atu maximiza impaktu projetu nian hodi asegura katak seguransa ai-han no situasaun nutrisional sei responde ba ema vulneravel sira. Hanesan nasaun illa ki'ik ida, Timor-Leste depende maka'as ba agrikultura ne'ebé mai husi udan been no ai-han importadu.

Hahú husi fulan Setembru 2023, El Niño hamosu kondisaun hanesan raimaran, udan ne'ebé tarde ona, no inundasaun durante tempu kuda iha nasaun ne'e. Disrupsaun ida ne'e afeita ba produsaun ai-horis no rendimentu agríkola, ne'ebé fó impaktu importante ba asesu ai-han no disponibilidade ba ema vulneravel barak iha área rurál sira.

Reprezentante WFP iha Timor-Leste Cecilia Garzon, hatete, mudansa klimátika ne’e realidade ida no kestaun globál ida-ne'ebé tenke rezolve atu asegura moris di’ak, inklui seguransa ai-han ba nasaun hotu-hotu.

“Ita-nia esforsu hamutuk ho governu nasionál ne'e esensiál tebes atu hamenus difikuldade sira ne'ebé populasaun sira ne'ebé vulneravel liu hetan afetadu hosi fenomenu klimátiku ida-ne'e,”dehan Reprezentante WFP.

Entretantu, fundu emerjensia hodi responde ne'e hanesan parte husi Fundu Sentral Nasoens Unidas nian ba Resposta Emerjensia (CERF), ne'ebé implementa liuhusi ajénsia tolu ONU nian, hanesan, Organizasaun Aihan no Agrikultura (FAO), Fundu Nasoens Unidas ba Labarik (UNICEF), no Programa Ai-han Mundial (WFP).

Enkuantu, WFP ninia objetivu mak atu apoiu Governu Timor-Leste ho efetivu liu hodi alkansa ninia atividade dezenvolvimentu no atinji objetivu halakon hamlaha iha nasaun ne'e.

Rate this item
(0 votes)

Independente Digital TV