Iha serimonia Lansamentu ne’e, asiste husi Diretor Jeral MSSI, Rui Manuel Expostu, Komisaria Direitu Labarik Dinorah Granadeiro, Reprezentante UNICEF, Scoot Whollery, Reprezentante Embaixador Australia Geordie Fung no mós ponto vokal sira ba protesaun labarik husi Munisipiu sira.
Tuir Diretor Jeral MSSI, Rui Manuel Expostu hatete, Plataforma online ida ne’e hanesan armejen ba rekursu, no iha kuiñesementu oin-oin ne’ebé sei ajuda ofisial protesaun labarik, pontu vokal violensia bazeia ba jeneru, atu haree kona ba oinsa halo servisu asistensia protesaun ba labarik iha Timor-Leste.
“Ohin ita mai hamutuk lansa plataforma online Covid-19 ba protesaun labarik ne’ebé dezenvolve ona iha tinan kotuk (2020) nia rohan, ne’ebé haforsa no hametin liu tan kapasidade atu atu responde ba iha situasaun emerjensia nian,”dehan nia, segunda ohin.
Nia hatutan, MSSI kontinua halo koperasaun ho UNICEF no parseiru sira hotu atu hametin sistema ba protesaun labarik no familia vulneravel sira iha Timor-Leste.
“Lori Governu nia naran, MSSI hakarak hato’o nia apresiasaun no fuan bo’ot ba Governu Australia ne’ebé kontinua fó asistensia mai Governu ida ne’e iha area protesaun labarik, ho nune’e bele ajuda Governu resolve problema ne’ebé kontese ba labarik sira,”dehan Rui.
Rui akresenta, Governu iha ona planu asaun anual entre MSSI ho UNICEF ba tinan 2021 to’o 2022.
Nune’e, tinan ida ne’e UNICEF sei dezenvolve mós sistema jestaun informasaun ba protesaun labarik baze dadus nian, atu bele bele resolve dezafiu ne’ebé Governu hasoru relasiona ho dadus.
Iha fatin hanesan, Komisaria Direitu Labarik, Dinorah Granadeiru hatete, Plataforma online ne’e, atu foku liu ba hodi rekolla material sira ne’eb’e liga ho situasaun Covid-19.
Nune’e, liu husi Plataforma ne’e bele hafasil servisu sosial no inan-aman no mós instituisaun ne’ebé presiza atu apoiu materia ba protesaun direitu labarik nian.
Tanba ne’e, Komisaun Direitu labarik hein katak, asistensia ba labarik sira kontinua lao no Governu garante liu husi lansamentu online ida ne’e bele hafasil ona servisu sosial sira nian.
“Komisaun Direitu Labarik louva ba MSSI ho UNICEF ne’ebé iha inisiativa hodi hamosu Plataforma online ida ne’e. Liu husi Plataforma ida ne’e, hafasil ona servisu ba ofisial protesaun labarik sira nian iha terenu,”tenik nia.
Reprezentante UNICEF Scoot Whollery hatete, nia senti kontente ho lansamentu plataforma ida ne’e, liu husi Plataforma ne’e bele ajuda hodi haforsa tan kapasidade responde ba emerjensia, nune’e mós ba atendementu servisu hotu protesaun labarik.
“Iha situsaun estadu emerjensia, nesesidade protesaun labarik sira nian aumenta tebes, tanba ne’e ita presiza hamrik metin atu haforsa liu tan sistema protesaun labarik, hodi responde ba nesesidade hirak ne’e,” dehan nia,
Plataforma ida ne’e hanesan instrumentu ida husi ekipa labarik sira ne’ebé atu haforsa liu tan kapasidade responde nian ba iha emerjensia no kapasidade kordenasaun nian, atu bele responde ba nesesidade ne’ebé demanda ba iha fatin.
“Ita hatene katak emerjensia hatodan risku ba labarik sira, familia no feto liu-liu ba labarik feto, no mós emerjensia hatodan sistema ne’ebé iha atu suporta sira,”tenik nia.
Nune’e, liu husi plataforma ne’e bele hare mós ba situasaun ida ne’ebé labarik sira infrenta hanesan, hetan abuzu ka violensia iha emerjensia.
Enkuantu, orsamentu ne’ebé hodi estabelese Plataforma online no mós programa sira seluk, hetan suporta husi Ajensia Australia iha Timor-Leste (DIFAT) ho montante dolar amerikanu $300.
Asistente Editor: Saturnina da Costa
