Konsellu Konsultivu Munisipál ne’e, bazeia ba diploma ministerial numeru 51/2016 ne’ebé hetan mós alterasaun husi dekretu lei numeru 54/2021.

Inkontru Konsellu Konsultivu Munisipál ne’e, kompostu husi Prezidente Autoridade, Sekretaria Munisipiu, Xefe Suku, Membru Governu, Reprezentante partidu politikus ne’ebé maioria iha Parlamentu Nasionál, reprezentante veteranus sira, organizasaun feto, juventude balun.

Prezidente Autoridade Munisipiu Dili, Gaspar Soares hatete, ohin Munisipiu Dili estabelese konsellu konsultivu nian atu fó apresiasaun ba kandidatu sira ne’ebé konkore ona.

“Nune’e, ohin aprezenta ba Konsellu Konsultivu Munisipal Dili nian hodi hetan apresiasaun ba kandidatu hirak ne’e,”dehan nia iha salaun MSSI Kaikoli Dili, segunda ohin.

Nia hatutan, kandidatu ba Prezidente Autoridade Munisipál Dili ne’ebé konkore ba vaga ne’e hamutuk na’in 7, maibé na’in 1 eskluido,  nune’e hela deit na’in 6.

Kandidatu na’in hirak ne’e konkore hotu ba pozisaun Prezidente Autoridade Munisipál.

Enkuantu, kandidatu ba Prezidente Autoridade Munisipiu Dili ne’ebé liu iha teste eskrita mak hanesan, Abilio Mesquita ho valor 13.2, Antonio Moniz Calau ho valor 13.2, Guilhermina Filomena Saldanha ho valor 13.6, Ivete de Fatima Sarmento de Oliveira ho valor 13.2, Manuel da Silva ho valor 10 no Sabino da Costa ho valor 11.8.

Entretanto, Ministru MAE, Miguel Pereira de Carvalho hatete, Bainhira naran kandidatu hirak ne’e konklui ona iha Grupo Tekniku Interministerial (GTI)  no Konsellu Konsultivu Munispal (KKM) hafoin lori ba Konsellu Ministru (KM) atu halo deliberasaun.

“ Ha’u rasik hanesan Ministru sei lori naran hirak ne’e ba iha Konsellu Ministru atu deskuti no halo deliberasaun ba ida ne’ebé sai nudar Prezidente  Autoridade Munisipal,” nia informa.

Asistente Editor: Saturnina da Costa