Vise-Primeiru Ministru dahuluk hanesan mós Ministra Solidariedade Sosial no Inkluzaun (MSSI), Armanda Berta dos Santos, hatete, selebrasaun loron nasional feto ne'ebé selebra ona iha loron 3 fulan-Novembru 2021, maibé partisipasaun feto husi suku no aldeia sira iha area remotas la sente.

Nia hatutan, loron Nasional feto nian labele selebra de'it iha Ministeriu ida-idak maibé presiza selebra iha fatin públiku atu ema hotu bele partisipa iha selebrasaun ne’e, atu nune’e feto Timoroan hotu senti loron ne’e espesial duni ba sira.

Selebrasaun ne'e nudar meius ida atu valoriza klean feto sira nia papel ba partisipasaun iha prosesu dezenvolvimentu no mós atu hatur konsiderasaun masimu hodi proteje feto sira husi situasaun risku no perigu nia laran.

Tuir nia, feto mak lideransa ida hodi haforsa demokarasia no kontribui ba dezenvolvimentu inkluzaun.

Ho nune’e, feto sira tenki pasensia hodi rona ema seluk koalia maibé mós tenke brani foti desizaun ba buat ne'ebé los, hodi fiar katak heroina feto sira nia mate iha luta nia laran bele hatutan istoria ba jerasaun foun.

Tanba ne’e, tenki fó oportunidade ne’ebé hanesan ba feto sira iha area hotu, nune’e feto sira labele hetan diskriminasaun iha area oin-oin.

“Iha selebrasaun loron Nasional feto nian ha’u hato'o ba entidade sira hotu atu hapara desvaloriza rezistensia feto nian, tanba se laiha feto laiha mós mane, tanba ne'e nu'udar parseiru estratejiku ida tantu husi uma laran, ekonomia, kultura no seluk tan,”dehan nia iha salaun MSSI Kailoli, segunda ne’e.

Entretantu, partsipante feto rural, Mariana do Rosário hatete, loron nasional feto nudar loron ida ne'ebé importante tebes iha istoria Timor-Leste no mós loron ne'e hodi fó rekoñesementu ba feto sira nia luta iha rezistensia nia laran.

Enkuantu, iha momentu ida ne’e hakarak fanun nafatin ema hotu, tantu feto no mane atu fó liman ba malu hodi kontribui ba dezenvolvimentu nasional.

Asistente Editor: Saturnina da Costa