Iha 8 Setembru ne’e, Ministra Solidaridade Sosial no Inkluzaun, Veronica das Dores ho ekipa vizita akantonamentu iha kapital Dili hodi apoiu nesesidade ne’ebé sarani sira presiza.

"Fatin konsentrasaun hotu ne'ebé ita-nia peregrinu sira husi Munisípiu mai hela ita vizita hotu ona. Ohin ekipa avansadu hamutuk 150 mak to'o uluk ona iha fatin sira prepara ba aban loron 9 Setembru simu vizita Amu Papa Francisco mai Timor-Leste, sira sei hamrik iha dalan aprezenta identidade kultura kada Munisípiu," dehan Veronica iha fatin akantonamentu iha area Kasnafar, Domingu (08/09).

Iha vizita ba kada fatin akantonamentu, nia dehan, nia parte haree nesesidade saida mak sira presiza apoiu hodi sira utiliza durante konsentra iha fatin hirak ne’e.

"Ohin ami ba iha fatin sira ne'e ita haree peregrinu sira presiza tebes apoiu husi ita hanesan biti, lona no aihan bázika sira, tanba sira hela iha fatin ne'e iha dapur rasik ba sira atu prepara hahán ba sira haan, atu bele uza ba kalan rua, durante tuir misa solene iha Tasi Tolu," katak nia.

Ministra ne’e afirma, MSSI laos apoiu pakote maibé apoiu bazeia ba nesesidade.

"Ita apoiu de'it saida mak sira bele uza ba kalan rua iha fatin konsentrasaun ne'e, fó ho domin ba sira molok sira tuir misa iha Tasi Tolu," dehan nia.