“Teste ba iha terrenu ne’ebé hala’o iha Postu Saúde ida iha Atabae ne’e hodi halo simulasaun ba rejistu dijitál ba programa BdM-Jerasaun Foun no hodi aprende karik sistema ne’e prontu ona antes lansamentu ba programa refere,”haktuir komunikadu imprensa ne’ebé Online INDEPENDENTE, asesu kinta ne’e (28/04).

Governate ne’e, afirma, sistema rejistrasaun dijitál ne’e sei prienxe papél operasionál ne’ebé importante ho dalan asegura katak jerente programa sira kolleta informasaun no dokumentasaun relevante husi poténsia benefisiáriu sira, atualiza no jere individual sira nia informasaun ho dalan ne’ebé sistemátiku liu, no verifika informasaun ba konsisténsia ho loloos.

Tuir planu, programa Bolsa da Mãe–Jerasaun Foun ne’e sei halo lansamentu iha fulan Juñu 2022 no sei hahú iha munisípiu Aináro, Bobonaro no RAEOA.

Fatin hirak ne’e selesionadu ona ba faze dahuluk, tanba númeru malnutrisaun aas iha fatin refere no programa ne’e hala’o tuir Konsellu Ministru nia desizaun katak iha 2025 programa ne’e gradualmente habelar nia kobertura iha territóriu tomak. 

Nia akresenta, rejistrasaun ba jerasaun foun sei hala’o iha nivel fasilidade saúde oioin iha munisípiu tolu refere, ne’ebé iha aplikante sira hanesan inan isin-rua no labarik tinan tolu (3) mai.

Nune’e mós bele ba vizita MSSI nia ofisiál rejistu iha fasilidade saúde sira.

“Teste iha terrenu ida ne’e hala’o depoizde programa sosializasaun ne’ebé estensivu ho líder lokál sira iha munisípiu tolu ne’ebé hahú uluk ba programa ne’e,”tenika Ministra.

Ho nune’e, Vise-PM ne’e hatutan, antes hala’o teste ida ne’e, ekipa MSSI no Ministeriu Saúde hala’o ona sosializasaun ba programa refere ba líder lokál sira iha munisípiu tolu hanesan Ainaro, Bobonaro no RAEOA.

“Ami hala’o teste sistema rejistrasaun dijitál ida ne’e antes lansamentu tanba ami hatene katak rejistrasaun iha papél importante hodi asegura informasaun ne’ebé konsistente no loloos hodi asegura ninia prontidaun antes lansamentu. Ha’u fiar, rejistrasaun dijitál nuudar sistema inkluzivu ida hodi tulun asegura poténsiu benefisiáriu sira hatene bainhira mak sira rejistu no iha ne’ebé hodi garante inkluzaun, dokumentu no informasaun saida mak sira presiza atu fornese, no bainhira mak sira sei hetan notifikasaun ba elijibilidade no desizaun ba aprovasaun,”haktuir Armanda Berta.

Entretantu, Bolsa da Mãe–Jeasaun Foun, estabelese tuir sistema asisténsia sosiál, kompostu ba subsídiu rua, hanesan, subsídiu isin-rua sei hetan dolar amerikanu $15.00 kada fulan. subsídiu ba labarik tinan tolu mai kraik ho dolar amerikanu $20,00 kada fulan, no labarik tinan 3 mai kraik ho defisiénsia sei simu suplementu adisional dolar amerikanu $10,00 kada fulan.

Bolsa da Mãe–Jerasaun Foun kria tuir Dekretu Lei nú. 22/2021, 10 Novembru – nuudar parte ba sistema asisténsia sosiál, ho ninia objetivu atu hadia saúde no nutrisaun ba inan no labarik, promove inkluzaun ekonomiku no mós estimula ekonomia lokál.

Ba sistema rejistrasaun dijitál ne’e dezenvolve husi Catalpa Internasionál ho orientasaun husi Painel Asesória ne’ebé kolabora ho PHD.

Enkuantu, dadaun ne’e, Vise-PM, Armanda Berta lidera Painél Asesória ba Bolsa da Mãe–Jerasaun Foun, orgaun ida ne’ebé kompostu husi ofisiál senior husi Ministériu Sosiál Solidaridade no Ministériu Saúde ho ekipa apoia téknika hanesan Catalpa Internasionál no Parseria ba Dezenvolvimentu Umanu (PHD).