Tuir Ministru Edukasaun Juventude no Desportu, Armindo Maia, hatete, lansamentu ba programa ne’e inisiativa husi MEJD rasik, ne’ebé mak hetan apoiu husi Governu Australia.

Nia hatutan, lansamentu ba programa ne’e atu bele fó tulun ba edukasaun liu-liu fó formasaun ba manorin sira atu hasa’e sira nia kapasidade atu bele sai edukadór ne’ebé diak.

Tanba futuru alunus sira nian iha edukadór sira nia liman, atu hanorin ho diak.

 "Programa ida ne'e distina ba mestre sira no diretores edukasaun, kordenadores no mós administrativu sira,”dehan nia ba jornalista sira iha EBF 5 Komoro, kinta ne’e (28/04).

Nia hatutan, programa ida ne’e mós importante tanba atu investe kualidade edukasaun liu husi manorin nian sira.

“Tanba saida mak ita fó importánsia ba programa ida ne'e, tanba ita hotu hatene katak, ita bele iha fasilidade no ekipamentu kompletu, maibé kuandu ita nia rekursu umanus hanesan mestre no diretores eskola sira laiha kapasidade jestaun ne'ebé diak, no kapasidade hanorin ne'ebé di'ak, entaun ita bele investe buat hotu-hotu maibé ita la lao ba oin,” tenik nia.

Enkuantu, programa Apoiu Lideransa liu husi Mentoria no Aprendizajen (ALMA) ne’e sei implementa iha munisipiu hotu iha teritoriu Timor-Leste.

Entretantu, Vise Embaixadóra Australia iha Timor-Leste, Suzy Wilson- Uilelea, hatete, eventu ne’e hatudu kolaborasaun ne’ebé diak entre Governu Austrália ho Timor-Leste hodi kontinua promove kualidade edukasaun ba labarik sira ensinu bázika.

“Ha’u haksolok tebes ho oportunidade iha eskola Bázika Filiál 5 Komoro hodi halo lansamentu programa apoiu lideransa liu husi mentoria no aprendizajen iha munisipiu Dili,”haktuir nia.

Nia akresenta, desde iha tinan 2016 to’o agora programa ALMA kobre ona iha munisipiu 12 inklui Oecusse no Atauro.

Iha tinan 2019 to’o 2020 programa ALMA implementa ona iha eskola públiku hamutuk 542, no servisu hamutuk ona ho lideransa hamutuk 774  no manorin 223.