Enkuantu, área prioridade tolu ne'e mak hanesan, lei protesaun ba labarik, polítika bem-estár sosiál ba labarik no formasaun profisionál ba funsionárius.
Ministra Solidariedade Sosial no inkluzaun Veronica das Dores hatete, UNICEF mak parseiru ida ne'ebé dezde 1999 to’o ohin loron, ne’ebé hakarak kontinua servisu hamutuk MSSI iha área protesaun ba labarik, polítika bem-estár sosiál ba labarik no mós formasaun profisionál.
Ministra dehan, daudaun ne’e UNICEF estabelese ona Sentru Solusoens Bazeadus ba Komunidade ka Community Based Solutions, ho ninia programa prinsipál tolu mak hanesan: hasoru família ka meeting family, empoderamentu foin sa’e no sentru amigavél.
Tan ne'e, Reprezentante UNICEF iha TL, Bilal Durrani husu ba Ministra atu lori no defende ezbosu estratéjia no polítika protesaun ba labarik, iha reuniaun Konsellu Ministrus nian, tanba lei ne’e importante tebes ba futuru labarik hotu iha Timor-Leste.
Entretantu Ministra mós hato’o pedidu ba reprezentante UNICEF ne’e, atu marka ajenda ida hodi halo aprezentasaun detallus kona-ba polítika protesaun ba labarik, ne’ebé ninia draft reprezentante UNICEF ne’e entrega ona ba Ministra ho Vise-Ministra MSSI.
“Ita hakarak haree hamutuk polítika ne’e, dala ruma iha hanoin balu ita bele aumenta ka deminui. Maibé importante maka ekipa tékniku ida sei mai aprezenta ba MSSI, antes ita lori ba deskuti iha Konsellu Ministrus”, dehan Ministra iha komunikandu ne'ebé Online INDEPENDENTE sita.
Ministra afirma, dadaun ne’e UNICEF mós planeia atu harii Institutu Nasionál Impaktu Sosiál, agora iha hela faze define enkuadramentu legál. Tan ne’e, UNICEF liu husi ninia Country Representative husu Ministra atu apoia politikamente.
Entretantu, ligadu ba asuntu formasaun profisionál nian, UNICEF haruka ona funsionárius na'in 8 husi MSSI, hodi tuir formasaun profisionál durante fulan ida iha Australia.
Formasaun iha rai laran mós UNICEF iha loron 10 Fevereiru 2023 entrega ona sertifikadus ba funsionárius MSSI na'in 8 ne’ebé konklui formasaun iha área Formadór Formasaun Profísionál Servisu Nain Sosiál (SNS). Formadór ba formasaun ne’e husi International Student Admission Teste (ISAT-Australia).
“Ami-nia prioridade mak atu kontinua serbisu hamutuk ho MSSI hodi hamutuk fó protesaun ba labarik sira labele sai vítima ba abuzu, no ami hakarak kontinua serbisu hamutuk ho MSSI hodi hasa’e kualidade rekursu umanus ne’ebé treinadu no kualifikadu hodi fó apoiu ba programa no polítika protesaun ba labarik”, dehan Reprezentante UNICEF iha Timor-Leste Bilal Durrani.
Aleinde ne’e, UNICEF mós estabelese ona Sentru Komunidade hamutuk 22 iha Timor-Leste, no membru sira maioria husi Sentru Komunidade ne’e husu ba MSSI atu kontinua fó apoiu ba sentru, ligadu ho programa protesaun sosiál ne’ebé MSSI servisu hamutuk ho Governu Australia implementa hela dadaun.
