"Ohin ami enkontru hamutuk ho Embaixadór Brazil hodi koalia kona ba oinsa atu kontinua halo kooperasaun hodi nune'e ba oin nafatin fasilita formasaun lingua Portugés ba manorin husi eskola primaria to'o eskola sekundaria privadu no publiku iha Timor-Leste" dehan Ministra Edukasaun, Dulce de Jesus Soares, hafoin remata enkotru iha salaun VIP-ME Vila-Verdi, Kinta (03/04).
Ministra dehan, formasaun ne'e importante tebes atu hasa'e koñesimentu no kapasidade manorin sira iha lian portugés, hodi hanorin estudante sira iha prosesu aprendizajem.
Ministra afirma, formasaun ne’e hala’o liu husi institutu formasaun INFORDEPE atu kontinua reforsa lian portugués iha eskola ida-idak atu garante kualidade edukasaun iha future.
Iha fatin hanesan, Embaixadór Brazil iha Timor-Leste Mauricio Medeires de Assis informa, Embaixadór Brazil ho Ministeriu Edukasaun kontinua halo kooperasaun di'ak liu tan, ba futuru Brazil bele fasilita formasaun lingua Português ba profesor sira iha territoriu laran tomak.
"Ami enkontru hamutuk ho sua exelensia ne'e diskute kona ba área edukasaun oinsa atu bele kapasita formasaun ba profesor sira hodi nune'e bele eleva kualidade edukasaun iha futuru tanba lingua sai lian ofisial entaun presiza promove lingua refere hodi nune'e bele motiva ema hotu", Embaixadór esplika.
Embaixador haktuir, la'os foin halo kooperasaun ho ME, maibé sira nia kooperasaun desde tinan 2016 mai to'o ohin loron la'o diak tebes, tanba hatudu nia progresu ne’ebé di'ak, liu husi formasaun ne'ebé formadór husi Brazil fasilita ba profesor sira iha área edukasaun nian.
Aliende ne'e mós, sira servisu hamutuk ho INFORDEPE hodi fasilita formasaun ba profesor iha área oioin hodi hasa'e koñesimentu kle'an liu tan profesor sira nian iha lian portugués, atu nune'e profesor sira bele transmite siensia ba estudante sira ho kualidade.
Entretantu, Embaixadór Brazil ne’e mós agradese ba ME ho ekipa, tanba sira servisu hamutuk iha área edukasaun nian la'o di'ak tebes liu husi formasaun lian portugués.
