Nia dehan, preparasaun SEI nian mak halo advokasia, tanba ne’e SEI husu atu feto hotu tenki brani no fiar an atu kandidata an, tanba lei fó dalan no garante partisipasaun feto iha vida politika.
“Mezmu la garante, ita mós tenki brani hodi kandidata an, depois kandidata an, saida mak sei halo, aliende advokasia sira, ami mós fó ajuda ba iha asosiasaun feto potensial sira iha munisipiu no mós ba sosiedade sivil sira ne’ebé sai parseiru ba SEI ne’ebé halo advokasi no mós hasa’e kapasitasaun ba iha feto sira hodi prepara kompete iha eleisaun suku sira,”dehan nia iha Ministeriu Finansas, tersa (01/08).
Ho nune’e, Sekretária Estadu Igualdade, espera iha tinan ida ne’e númeru partisipasaun feto iha eleisaun suku bele aas liu tan.
“Maibé ida ne’e, depende ba feto sira, sira pronto kalae?, SEI iha pozisaun ida katak, lei fó dalan no SEI sei halo nia papel atu garante sira ne’ebé pronto atu kandidata an hetan preparasaun ne’ebé SEI dedika ba sira”tenik nia.
Tan ne’e, SEI mós sei halo programa interkambiu ida hodi enkoraja feto sira atu partisipa masimu iha eleisaun suku sira.
Rekorda katak, Prezidente Parlamentu Nasional Maria Fernada Lay husu ba maluk feto sira atu prepara aan hodi konkore iha pozisaun sira hanesan, prosesu desentralizasaun, Lideransa Suku, Aldeia no mós pozisaun sira seluk.
Tuir nia, iha feto barak ne’ebé matenek maibé seidauk iha oportunidade tan ne’e husu atu feto sira tenki prepara an hodi bele konkore iha pozisaun hotu, tanba lei fó dalan.
