Prezidente KRAM Octavio Conceinção liu husi konferensia imprensa hatete, agora dadauk KRAM simu ona lista graduadu husi organizasaun PSHT ne'ebé lideradu husi Presidente PSHT, Baltazar Seixas Lemos ho nia Sekretáriu Jerál Pedro Euzébio Aparício, kona-ba ba kalenderizasaun ba serimonia graduasaun no oraraiu tes jago nian.
Tanba ne’e, KRAM informa ba públiku tomak relasiona ho prepasaun ba graduasaun PSHT Timor-Leste, ne'ebé komisaun organizadora ho nia kompetensia propria ne'ebé atribui iha lei no.5/2017, liliu sita iha artigu no.3 kona-ba autorizasaun preve iha aliña C katak, atividade prátika arte marsisais hotu-hotu ne'ebé nakloke ba públiku tenki hetan autorizasaun husi KRAM.
“Tan ne'e, iha tinan kotuk, ami hala'o servisu hamutuk ho Organizasaun Persaudaraan Setia Hati Timor-Leste realiza graduasaun ida ne'ebé la'o iha Timor laran iha fatin haat hanesan iha Dili, Maliana, Baukau no Same ne'ebé la'o susesu iha tinan kotuk” dehan Prezidente iha Salaun KRAM Lecidere, Kuarta (02/08).
Prezidente afirma, rezultadu servisu sira husi tinan kotuk hatudu katak situsaun hotu la'o ho di'ak no ema hotu asisti eleisaun presidensia no eleisaun parlamentar la'o ho hakmatek iha teritoriu laran tomak.
Nia esplika, ba susesu sira ne'ebé iha sai hanesan mós sasukat ida ba IX Governu Konstituisional ne'ebé lideradu husi Primeiru Ministru Kay Rala Xanana Gusmão, kontinua aposta ba dezenvolvimetu arte marsiais iha TL, ho nune'e Ministru Juventude Desportu Arte no Kultura orienta ona KRAM atu hahú prosesu preparasaun koordenasaun konsolidadsaun sira ho lideransa no estrutura PSHT hodi organiza gradusaun ba tinan 2023 nee hodi bele la'o ho di'ak.
“Ita hotu hatene katak graduasun ne'e aprezenta husi organizasaun arte marsiais liliu PSHT, tuir lei no. 5/2017 depois de KRAM simu tiha sira nia informasaun sira kona-ba preparasaun sira mak sei KRAM hahú halo prosesu verifikasaun ba lista graduadu, dewan pengesaha, fatin no kalendáriu ba graduasaun mak KRAM sei hasai para ser favoravél ba Ministru Juventude Arte no Kultura hodi informa kona ba prosedimentu sira relasiona ho graduasau organizasaun PSHT nian,” nia esplika.
Ho ida ne'e, Prezidente KRAM hakarak hatete ba públiku katak governu hatene de'it mak organizasau ne'ebé rejista iha Ministériu Justisa (MJ), Diresaun Jerál Servisu Rejistu Notariadu, ne'e mak Organizasaun PSHT ne'ebé lidera husi Baltazar Seixas Lemos.
Ho nune'e mak atividade graduasaun hotu-hotu ne'ebé sei hala'o iha tinan 2023 tenki kolabora hamutuk ho organizasaun ne'ebé lidera husi Prezidente PSHT.
Entretantu, tuir dadus membru PSHT ne’ebé atu simu graduasaun iha tinan ida ne’e ho total hamutuk rihun 10 resin.
