Diretór Jerál Administrasaun Finansas-ME Antoninho Pires, hatete, Ministériu Edukasaun fó tan tempu oituan ba benifisiariu bolsa Meritu atu loke sira nia konta bankaria, maibé tempu ne'e defende ba ME nia esforsu.

“Ministeriu Edukasaun  hamutuk ho Diretor Eskola, Diretór Munisipal hodi buka meius oinsa bele fó benifisiariu sira nia osan. Ha’u hanoin depende ba Ministériu nia esforsu, hamutuk ho diretór munisipal sira no diretor eskola sira hodi bele hare meius saida mak halo hodi hare ba benifisiariu ne'ebé seidauk iha konta bankaria nune'e bele hetan sira nia direitu refere,” dehan DJ iha nia knar fatin (01/08).

Diretór afirma, tempu ne’ebé Ministeriu Edukasaun extende limitadu, nune’e diretores eskola sira bele buka meius atu estudante sira bele iha konta bankaria.

Ho nune’e, ba sira ne'ebé iha ona konta bankaria, BNCTL kontinua halo pagamentu.

Entretantu, tuir dadus benisifisiariu bolsa méritu ne'ebé oitavu governu deside, total hamutuk rihun 12,297.

Enkuantu, husi dadus ne’e, rihun ualu (8) mak loke ona konta bankaria no BNCTL halo ona pagamentu.

Maibé sei hela rihun haat resin mak seidauk loke konta bankaria.