Iha fulan Dezembru tinan 2020, MoU entre klinika Bairo-pite ho Ministériu Saúde kona-ba lisensiamentu klinika refere mate ona nune’e parte klinika hato’o pedidu ba MS hodi bele renova, maibé to’o ohin loron MS seidauk fó resposta pozitivu.

Diretór Klinika Bairru-Píte, Inacio dos Santos hatete, difikuldade boot ne’ebé klinika Bairru-Píte hasoru, aleinde finanseiru, hasoru mós difikuldade atu importa doasaun aimoruk husi rai li’ur tanba MS seidauk hatudu interese hodi renova nota intendimentu (Memoradum of Understanding—MoU).

“Entau difikulta tebes ita atu bele importa médikamentu doasaun sira husi rai li’ur, durante ne’e médikamentu tolu mak ita hetan doasaun husi nasaun li’ur hanesan insulin, aimoruk kankru ran, ikus mak sezerain,” dehan nia iha nia knaar fatin, Sesta (18/06).

Inacio dehan, pasiente ne’ebé daudauk ne’e hala’o tratamentu ativu iha klinika no persiza aimoruk hirak ne’e hamutuk na’in 81, kompostu husi pasiente diabetes na’in 55 ne’ebé depende ba aimoruk insulin, pasiente kankru ran na’in 25, no pasiente na’in ida depende ba aimoruk sezarian.

Iha fulan hirak nia laran, nia hatete, klinika labele fó aimoruk ba pasiente sira ne’e tanba aimoruk hirak ne’e laiha ona, no atu husu doasaun mós labele tanba bainhira hatama alfandega la autoriza tanba klinika seidauk iha MoU ho MS.

 “ Ita hein hela autorizasaun husi Ministériu Saúde atu hatama aimoruk sira ne’e, maibé to’o ohin loron seidauk iha rezultadu, entaun prosesu ne’e difikulta tebes ami, pasiente sira ne’e mós depende de’it ba aimoruk sira ne’e,” katak nia.

Tanba aimoruk hotu, nia hatete, dalan uniku ba klinika mak fó reseita ba pasiente sira atu ba sosa aimoruk refere iha klinika privada sira.

“Entaun ami hanoin katak MS nia apoia mai klinika ne’e entre iha seriedade ou laiha, mezmu iha suporta balun MS fó, entermu rekursu umanu, maibé suporta masimu klinika atu la’o ba iha legalidade lisensamentu atu fasilita klinika laiha.”

“Ita haree de’it, memorandum ne’e mate iha Dezembru 2020, iha tinan ne’e kedas ha’u rasik hatoo karta atu renova memorandu ne’e maibé to’o hoin loron ita la hetan memorandu ne’e, ministra la presiza lori tempu naruk, oras ida, oras rua halo karta bele asina ona. “

“Bainhira uluk klinika iha memorandum ativu ho MS, entaun ita la lori prosesu ne’ebé naruk atu hatama aimoruk, hatama de’it taxa hodi prosesa maibé agora MS pendente hela entau ami tenke hein de’it,” dehan Inacio.

Entretantu, molok ne’e, bainhira jornalista sira husu kona-ba problema iha Klinika Bairo-Pite, Minista Saúde, Odete Maria Freitas Belo hatan katak, asuntu kona-ba klinika so bele husu nia bainhira nia hala’o ona enkontru ho parte klinika Bairo-pite.

“Ha’u sei iha enkontru ho Bairru-pete, enkuantu ha’u enkontru ho Bairru-pite mak ita-boot sira (jornalista) bele husu kona-ba Bairru-pite,” dehan Ministra ne’e sein informa bainhira mak nia iha tempu atu realiza enkontru ho parte klinika Bairo-pite.