"Prezidente Repúblika sei ko'alia ho Ministériu Edukasaun atu estebelese tan eskola rekorrente ninian atu estebelese nivél ensinu sekundária ne'e ba maluk difisiensia matan Timor-Leste," informa Diretór Ezekutivu Uniaun Defisiénsia Matan Timor-Leste (UDMTL), Jacinto Pereira, iha Palasiu Prezidensiál Bairru-Pité, Sexta (17/6).

Nia dehan, Xefe Estadu mós sei haruka nia ekipa asesór sira tuun direita ba terrenu no halo kontaktu direita ho Ministériu Solidaridade Sosiál no Inkluzaun (MSSI) atu ko'alia ho sira liga ho apoiu instituisionál ne'e.

Nia esplika, UDMTL husu ba Xefe Estadu iha nia mandatu tinan lima ne'e bele fó pareser ruma ba Ministériu Edukasaun atu estabelese tan eskola sekundária, liuliu eskola rekorrente bele estebelese tan faze seis ba maluk difisiensia matan sira atu asesu.

Tanba daudaun ne'e sira estebelese to'o de'it iha pre-sekundaria, entaun maluk ho defisiénsia matan remata iha pre-sekundária sira atu ba tan sekundária ne'e susar.

Entretantu, Uniaun Difisiensia Matan Timor Leste (UDMTL) harii iha tinan 2004 ho membru liu rihun tolu (3.000), maibé membru ne'ebé daudaun ativu ne'e hamutuk liu 40, maibé dadus jerál ho ema ho difisiensia matan 14.118.