Tuir Diretora Jeral Ministeriu Saúde, Odete Viegas hatete, situasaun ne’ebé Ministeriu Saúde infrenta iha terenu, relasiona ho fatin izolamentu, nune’e Ministeriu saúde dadaun ne’e buka meius transforma mós kuarentena Tasi-tolu ba ona fatin izolamentu.
“Enkuantu solusaun saida mak Ministeriu Saude foti hela atu aumenta tan fatin iha izolamentu Tasi-tolu nia oin ne’e atu fó espasu 40 kama bele prevene kazu positivu ne’ebé aumenta iha loron ohin no aban,”dehan nia iha Ministeriu Finansas, Aitarak Laran (24/03).
Aleinde ne’e, Ministeriu Saúde sei hare mós hotel balun atu tau fatin izolamentu, hafoin sei hare tan espasu saida mak ministeriu sei halo iha tempo oin mai.
Entretantu, kona ba kompaña sira ne’ebé fornese hahan ba fatin kuarentena no izolamentu iha kompaña tolu no hotel sira ne’ebé sai hanesan fatin kuarentena hamutuk 10.
Entretantu Ministru Prezidensia Konsellu Ministru, Fidelis Leite Magalhãens mós reforsa tan katak, responsavel sira sala situasaun SIJK nian mós aprezenta hanesan prioridade imediata hodi foku ba transmisaun nian ne’ebé eziste, liuhusi detesaun lais ida no izolamentu husi kazu pozitivu hotu-hotu.
SIJK hakarak aumenta kapasidade análize laboratoriál no rastreiu kontaktu nian sira.
Ne’e mós hanesan prioritáriu hodi prevene transmisaun virus ba munisípiu sira seluk no atu prepara asaun sira mitigasaun nian ne’ebé presiza ba posivel foku transmisaun komunitária ne’ebé bele iha.
Objetivu prioritáriu sira seluk maka mitigasaun kona-ba efeitu sosiu ekonómiku sira Covid-19 nian.
Jornalista: Saturnina da Costa
Editor: José Sarito Amaral
