"Loos duni, ami mós akompaña hela, situasau ne'e segunda-segunda husi distinta deputadu sira husi Parlamentu Nasionál hato'o hela preokupasaun sira ne'e ba sua exelénsia Vise Ministru Assunto Parlamentár nian, loos ita haree pur akazu, ita nia profisionál saúde sira ne'ebé mak rejime kareira espesial ne'e presiza atu koloka tan ba fasilidade saúde kuidadu primaria sira iha ita nia rai, la'ós iha de'it Alas de'it mais ba iha Munisípiu, Postu Administrativu,suku mós hanesan," afirmaVise Ministru Fortalesimentu Instituisionál Saúde, José dos Reis Mango, ba Jornalista sira iha Largo Lecidere, Sesta (08/08) hafoin lansamentu ba Wolcbahia.

Nia dehan, nesesariu tebes tau profisionál saúde iha fasilidade súde sira hodi bele fo atendimentu ba komunidade sira.

"Iha vaga lubuk ida mak mamuk hela ita la bele priense, maibé neneik ita hahú priense ba vaga sira ne'e, memang vaga sira-ne'e seidauk to'o ita presiza aumenta tan tanba haree ba referensia internasionál ka Organizasaun Saúde Mundiál nian nesita duni atu bele aumenta".

"Tanba ami nia mandatu hela tinan rua liu oituan, mas ami halo esforsu ona para oinsá implementasaun funsionamentu fasilidade saúde sira liu-liu, ba iha kuidadu saúde primária iha nivél sira bele la'o ho di'ak," Vise MS haktuir.

Molok ne'e Xefe Bankada Partidu Demokrátiku, Manuel Henrique Noronha hatete, postu saúde Ferik Sare menus tebes médiku no laiha sala maternidade, tanba ne'e populasaun rasik husu Governu liu-liu Ministériu saúde atu toma atensaun.

"Ami mós ba haree Sentru Saúde ne'ebé mak iha Ferik Sare iha ne’ebá atu hatete katak totál populasaun ne'ebé mak Asesu postu saúde ne'e populasaun iha área ne’ebá besik rihun 3 mak iha ne’ebá," deputadu Manuel Hanjam Noronha, levanta asuntu ne’e iha Plenária Parlamentu Nasionál foin lalais ne’e.

Nia fundamenta, Postu saúde ne'e iha de'it médiku ida (1) no Kliner ida (1) maka halo atendimentu, kuaze lorloron atendimentu menus liu ba ema 25 mak ba halo tratamentu.

"Komunidade sira husu liu-liu ba Ministériu bele koloka tan médiku ida no mós Ministériu Saúde bele tau Planu prioridade hodi aumenta tan sala maternidade ida. Ho razaun kuandu ita nia inan feton sira ne'ebé mak atu partus lori mai postu saúde no depois hodi hein karreta lori mai Sentru Saúde Alas ne'e kuandu tarde entaun iha feton sira tenke lori fila ba partus iha uma ka partus tradisionál," nia hatutan

Tanba ne'e mak husu Ministériu Saúde tau iha planu atu bele halo tan konstrusaun sala maternidade ida hodi atende inan-feton sira ne'ebé atu partus.

Iha fatin hanesan, Vise Ministru Asuntu Parlamentár (VMAP), Aderito Hugo da Costa hatete, nia parte sei haruka informasaun ne'e ba Ministra Saúde atu tau iha atensaun.

"Postu saúde iha Ferik Sare sei haruka informasaun ne'e ba Ministeriu saude hodi tau atensaun ba mínimu prezensa médiku iha sentru saude iha Ferik Sare ne'ebé ke iha de'it mediku na’in ida, ne'e mós ita la hatene médiku ne'e, médiku jerál ka médiku espesialista,” nia tenik.