Montante ne’e aloka bá Saláriu no Vensimentu $1,254,895, Bens no Servisu $14,368,949 no Transferênsia Públika $25,000,000.
Ministeriu Finansas entrega Tetu Orsamentu ne’e bá Ministru Petróleu no Rekursus Minerais, Francisco da Costa Monteiro hamutuk ho dirijente hosi Instituisaun Tutelada sira hanesan Autoridade Petróliu no Minerais ho Institutu Petróliu no Jeolojia durante aprezentasaun Proposta Planeamentu no Orsamentu tinan 2026 bá Komité Revizaun Orsamentu (KRO), ne’ebé lidera hosi Primeiru-Ministru (PM), Kay Rala Xanana Gusmão.
“Ami mai iha-ne’e hodi aprezenta proposta Orsamentu Ministériu nian ho Instituisaun Tutelada sira bá KRO. Antes ne’e Ministériu Finansas prepara ona tetu orsamentál bá ministériu ida-idak. MPRM rasik prepara ona ninia orsamentu hodi propoin bá MF no ami mós detekta katak iha nesesidae atu husu tán orsamentu adisionál,” dehan Ministru Petróleu no Rekursus Minerais, Francisco da Costa Monteiro, iha Ministériu Finansas, Sesta (08/08).
Iha KRO ne'e, MPRM mós husu orsamentu adionál tanba durante aprezentasaun Ministru ho dirijente sira justifika mós ho fahe informasaun kona-bá servisu sira ne’ebé Ministériu halo inklui planu sira bá oin ho nia implikasaun bá orsamentu ne’ebé asosia ho planu sira ne’e.
“Tetu Orsamentál ne’ebé MF fó bá MPRM la to’o. Tanba ne’e mak ami husu tán orsamentu adisionál ho montante kuaze millaun 100-resin tanba atu aloka bá iha seitór petróliu ho minerais,” nia hateten.
Nia dehan, daudaun ne'e Ministériu halo hela estudu tékniku importante sira ne’ebé atu bá konvense no mós afirma Timor-Leste nia pozisaun dada Kadoras mai Natabora hodi dezenvolve indústria petrolíferas iha nasaun ne’e.
Alende ne’e, sei iha mós implementasaun projetu tasi-mane Suai Base ne’ebé tenke la’o, auto estrada mós tenke la’o.
Hosi parte Minerais nian, tinan kotuk Ministériu indentifika loloos ona lisensiamentu sira iha rai laran, hirak ne’e iha fatin balun fó lisensa no fatin balun seidauk fó lisensa. Sira ne’ebé hetan ona lisensa, empreza sira komesa servisu daudaun hein katak tinan oin bele iha ona rezultadu balun.
Kona-bá ezekusaun Orsamentu Jerál Estadu (OJE) tinan 2025, MPRM ho Institutu Tutelada sira atinji ona 50%-resin, no Ministru garante katak iha fulan oin mai ezekusaun sei sa’e makaas tanba oras-ne’e daudaun iha projetu balun mak sei iha faze tenderizasuan, balun la’o hela.
