Karreta ambulánsia hirak ne’ebé iha kondisaun tuan hotu ona no labele halo operasaun másimu. Ne’e duni, Ministériu Saúde presiza tebes viatura atu fasilita pasiente sira iha tempu emerjénsia.

Diretór Nasionál Servisu Hospitalar no Emerjénsia, Horácio Sarmento da Costa hateten, karreta ambulánsia barak maibé tuan hotu ona. Agora presiza karreta foun para bele substitui ba munisípiu, referénsia no ospitál nasionál sira.

Tuir dadus, karreta ambulánsia ne’ebé funsiona iha territóriu Timor tomak hamutuk 36. Nune’e, iha mós karreta sia maka aat no bele halo manutensaun maibé sei halo gastu osan boot.

“Tuir relatóriu mekánika sira husi Austrália, bele hadi'a mós ho gastu ne’ebé boot”, dehan nia, iha Bekora, horisehik.

Nia hatutan, servisu ambulánsia nian iha tinan oin, tuir planu sei sai institutu autónomu. Ne’e duni, importante atu identifika rekursu hotu-hotu atu kompleta antes hamriik mesak.

PN Preokupa Falta Ambulánsia

Entretantu, Parlamentu Nasionál (PN) liu husi Bankada Partidu Demokrátiku (PD) preokupa tebes falta ambulánsia hodi evakua pasiente husi suku ba ospitál referénsia sira iha munisípiu.

Deputada Elvina Sousa hatete, fiskalizasaun iha munisípiu Manatutu no Aileu, povu sira hato’o rekomendasaun kona-ba menus ambulánsia atu uza hodi ajuda povu sira.

“Ha’u rekomenda ba governu atu tau osan hodi sosa ambulánsia hodi fó ba munisípiu rua, inklui mós munisípiu hotu-hotu”, tenik nia.

Problema ambulánsia la'ós foin akontese, maibé ne’e dala barak ona maibé governu seidauk bele responde.

Deputada ne’e konsidera falta ambulánsia sei difikulta servisu saúde nian iha sentru no postu saúde sira oinsá atu bele halo atendimentu di'ak ba povu.

Tanba ne’e, husu ba Ministériu Saúde atu halo planu polítika atu iha Orsamentu Jerál Estadu (OJE) 2019 bele tau osan hodi halo akizisaun ba ambulánsia foun hodi distribui ba kada postu saúde no sentru saúde sira.