“Se dehan atu elimina fali (sosa karreta foun) plenária maka deside, la'ós Prezidente Parlamentu maka deside ne’ebé sala sasaran dirije fali Prezidente maka tenke kansela”, tenik PPN Arão Noe de Jesus iha Palásiu Prezidensiál, Bairru-Pité, horisehik.

Nia esplika, orsamentu privativu ne’e aprova iha plenária tenke asina haruka ba governu hatama ba Orsamentu Jerál Estadu (OJE), aban bainrua tama OJE mai debate espesialidade maka deputadu balun hatama proposta atu elimina, prontu atu admite ba debate no vota.

Agora labele deside iha loron 5 Novembru 2018, tanba prosesu orsamentu sei debate OJE iha komisaun espesializada iha loron 8 Novembru 2018. Nune’e, debate iha plenaria PN parese Dezembru 2018.

“Labele sira mai hakilar ami elimina tiha”, tenik Arão.

Entretantu, kona-ba dada karreta sira ne’ebé III lejizlatura, tuir asesór legál sira, Parlamentu laiha kbiit atu halo despaxu atu foti karreta ne’e iha uma ida-idak, dalan úniku bele halo prosesu ne’e ba legál.

Movimentu Universitáriu Timor Leste (MUTL), iha Segunda (29/10), lori ona petisaun ba Parlamentu Nasionál, maibé sira ezije atu to’o iha 5 Novembru 2018, tenke iha desizaun ida atu muda karreta.