Jogu desportivu CPLP, ekipa bainaka Angola, hamo’e ekipa Timor-Leste nia mehi tama ba faze final ho golu 3-1, iha nia uma-rasik.

Iha ínisiu jogu, ekipa rua halo kedan kontra atake ba malu tuir tátika no estrátejia ekipa ida-idak ni’an, hodi hadau hatama golu iha jogu primeira parte.

Ekipa Angola halo kedan jogu ne'ebé agresivu, hahu husi minutu primeiru, jogadór sira-ne'ebé kontrola bola husi ain-ba-ain, ne'ebé ligasaun entre meiu kampu karuk ba los, hodi fo presaun ba Timor-Leste.

Jogu agresivu Angola ni’an, foin to'o de’it minutu 6, jogadór Pedro ho númeru kamizola 15, lansa kedas sutu ba guarda rede Timor-Leste ni’an, konsege muda score ba 1-0.

Husi golu ne'e, la kleur, hakat de'it ba minutu 8, Alexmar dos Santos, fura tán guarda rede Tmor-Leste ni’an, muda Angola lidera kedas tabela score ho 2-0.

Golu rua aumenta espiritu jogador Angola, hodi domina bola iha kampu laran, enkuantu obriga Timor-Leste tenke esforsu maka’as hodi halo balansu ba jogu, maibé difisil tebes ba uma-na’in, tanba jogadór Angola hala'o jogu tuir jogadór ida-idak nia skill ne'ebé iha.

Ho skill no mentalidade ne'ebé iha, halo jogu sai atrativu liu tán, halo estádiu Dili barullu liu tan ho adeptus rihun ba rihun, ne'ebé iha tribuna parte lorosa'e no parte loro-monu,  hodi fo suporta maka’as ba ekipa rua.

Funu ho bola entre ekipa rua manas liu tán, nune’e ekipa ne'ebé lideradu husi Treinadór Koreanu ne'e, hetan presaun maka’as liu tán, halo mentalidade jogadór Lafaek ni’an komesa tuun no la hetan bola, lansa sutu ba guarda rede Angola ni’an.

Maske nune’e, ekipa uma-na'in koko uza oportunidade balun, pasa ba malu, halo lansa atake. Husi lansa atake ne'e  jogadór, Manuel Reinaldo ho númeru kamizola 17, simu bola husi jogadór Jerimias Bareto ho númeru kamizola 19 husi kampu klaran.

Husi bola ne’ebé pasa husi kampu klaran, jogadór Reinaldo ezekuta ho di'ak liu husi lansa sutu, konsege rezulta golu hodi muda score ba 2-1 hodi termina jogu primeira parte nian.

Hakat ba jogu segundu parte, ekipa rua hala'o jogu ho kalma, pasa bola husi ain-ba-ain hodi buka oprtunidade diak hodi aumenta golu.

Maske ho jogu ne'ebé la’o ho kalma, Ekipa Angola komesa halo mudansa jogu liu husi nia estrátejia no skill jogador ne'ebé iha, hodi domina liu bola iha kampu laran, enkuantu Timor-Leste koko sai husi presaun, maibé Angola la fó oportunidade.

Ho rítmu jogu sa’e liu tán ho animu adeptus iha estádiu Dili, Angola domina bola  hodi kontinua fó presaun ba ekipa uma-na’in. Jogu segundu parte foin la’o to'o minutu 46,  jogadór Paulo Livumbo, ho númeru kamizola  9, ne'ebé simu bola husi parte loos, hodi konsege fura tan Guarda rede Timor-Leste nia hodi muda rezultadu ba 3-1, hafoin simu bola husi jogadór, Francisco ho númeru kamizola 18.

Uma-na’in sofre golu rua, Treinadór Timor-Leste koko halo substituisaun ba nia jogadór, Gilson ho  númeru 14 no hatama fali jogadór Vong ho númeru kamizola 11, nune'e bele halo balansu ba jogu no lansa atake ba adversáriu, maibe liña defensivu Angola nian ne'ebé solidu, hodi la fó fatin ba Timor-Leste hodi sutu ba gaurda rede.

Husi ekipa bainaka halo jogu ho atake ne'ebé adekuadu no hetan oportunidade barak liu hodi lansa  sutu, maibé jogadór  liña defensiva Timor-Leste koko hametin liña defesivu hodi la oportunidade  ba adversáriu produs tan golu.

Duela entre  ekipa rua iha kampu laran, manas liu tan, jogadór sira lansa bola ba mai hodi buka aumenta golu, maibe minutu ne'ebé la’o lais tebes obriga arbitru tenke  termina jogu ho score 1-3.

Husi rezultadu ne’e, Ekipa Angola sai manan na’in hodi hakata ba final jogu futeból CPLP.

Purtantu, finál jogu CPLP ne'e, Angola sei hosoru nia adversariu Cabo-Verde, ne'ebé sei realiza iha loron 26 ne'e, iha estadiu munisipál Dili.

Enkuantu, ekipa uma na'in Timor-Leste sei enfrenta jogu hasoru Portugál hodi hada’u malu Terseiru lugar.