“Apela ba populasaun iha Salele, Suai Vila no Covalima nia laran tomak, atu labele pániku. Favór tuur hakmatek iha idak-idak nia fatin,”apela husi Kordenadór Forsa-Tarefa ba Prevensaun no Mitigasaun Surtu COVID-19, Dr. Rui Maria de Araújo, domingo ohin, iha sala Situasaun-Sentru Integradu Jestaun Krizi (SS-CIGC), CCD Dili.

Dr. Rui informa katak prosesu rastreiu seletivu em massa ka screening ne’ebé hala’o iha Munisípiu Covalima, Bobonaro ho RAEOA, sei nafatin la’o hela. Amostra ne’ebé foti husi dia 26 mai to’o ohin nei nafatin hatudu rezultadu negativu.

Tanba ne’e nia husu ba populasaun atu lalika la’o ba-mai lai, fó tempu atu ekipa saúde ho ekipa konjunta Unidade Territoriál CIGC-SS, Munisípiu Covalima, buka tuir kontaktu sira hotu, no foti tán amostra hodi bele halo teste.

Nunee mós, apela ba populasaun Timor-Leste tomak, atu nafatin matan-moris neon-na’in, pratíka nafatin medida sira, hanesan uzza mascara, fase liman bebeik ho sabaun ka dezinfetante ruma, bainhira kumprimenta malu, lapresiza ka’er-liman, bensa-liman, rei-malu ka haku’ak-malu, evita halibur malu barak, no hamriik ka tuur dook husi ema seluk, mínimu metru ida ho balun.

Tuir dadus foun, kazu konfirmadu positivu Covid-19 iha Timor-Leste, ne’ebé baixa iha sala izolamentu Vera Cruz Dili hamutuk 23, no rekuperadu na’in ida (1).