Diretor Jerál SNAEM.IP Simplicio Amaral de Deus hatete, Viatura ambulansia lima ne'e sosa ho Orsamentu Jerál Estadu (OJE) 2024 ho montante dolar amerikanu rihun $300, husi orsamentu ne’ebé PN aloka ba iha SNAEM,IP ho montante millaun $2 resin.
Diretor Jerál ne'e dehan, viatura lima ne'e seidauk bele atu kobre evakuasaun iha teritoriu laran tomak, tanba númeru ambulánsia ne'ebé eziste iha kada servisu emerjénsia Medika inkliu Rejiaun Administrativa Espesial Oekusi Ambeno (RAEOA) atu atende populasaun sira nia nesesidade iha evakuasaun emerjénsia la sufisiente.
"Maibé ho kuantidade ambulánsia foun ne'ebé mak SNAEM hetan agora sei fó espíritu servisu di'ak liu tan hodi asegura garante no servi povu ida ne'e," dehan Diretor iha salaun Palasiu das Cinzas Kaikoli, Kuarta(04/12).
Nia hatutan, maske ho numeru ambulánsia ne'ebé natón maibé sei atinji objetivu bazeia bá planu estratejiku SNAEM nian iha servisu emerjénsia medika sira hotu inkliu RAEOA.
Nune’e, minimu servisu saúde sira hetan ambulánsia tolu hodi nune'e bele hala'o servisu di'ak liu tan, hodi halo Transferênsia no evekuasaun lalais ho efikás profisionál no fó satisfasaun bá populasaun tomak iha TL.
Diretor Simplicio informa, viaturas ambulánsia ne'ebé iha teritoriu laran tomak dadaun ne'e hamutuk 58 no husi númeru ne'e iha 25 mak sei di'ak hodi bele uza, ho nune’e hamutuk SNAEM fó tan foun lima ne'ebé hamutuk 30 hodi atende ba komunidade sira.
Enkuantu, iha mós ambulánsia 28 ne'ebé dadaun ne'e kondisaun aat ona, labele uza no labele atu halo tan manutensaun, tanba ne'e SNAEM entrega ona bá Patrimóniu estadu.
Iha fatin hanesan, Vise Primeru-Ministru Ministru Koordenadór Asuntu Sosial No Ministru Dezenvolvimetu Rural Abitasaun Komunitária Mariano Asanami Sabino hatete, iha tinan 2025 governu sei sosa tan viaturas Ambulánsia lima (5), maibé tuir nia sei sukat kapasidade ne'ebé hodi kompleta iha tinan 2026.
Vise Primeiru Ministru dehan, tanba fasilidade sira ne'e importante, tanba saúde ho edukasaun pilar ida ne'ebé importante tebes ba estadu no nasaun. Maibé pilar rua ne’e iha rai seluk sai problema hotu bá nasaun ka estadu.
“Ba Timor-Leste ne'e sai prioridade fundamentu tebes ita tau iha ita nia planu estratejiku dezenvolvimentu Nasionál ita hatene katak sé deit mak servisu iha saúde ho edukasaun ne'e la'os hanesa servisu de'it maibé ne'e hanesan misaun ida ne'ebé importente tebes ba ita nia rai tanba úniku saúde mak bele fó esperansa no salvasaun ba ita nia povu, kuidadu ba povu, no hamosu hanoin ne'ebé saudavel no nasaun mós bele saudavel," dehan Ministru.
Enkuantu, viaturas ne'e sei distribui ba Munisípiu haat hanesan Aileu, Lautem, Covalima no Dili nian sei entrega bá Aeroportu internasionál Prezidente Nicolao Lobato Comoro hodi halo servisu iha fatin refere.
