Vise Ministra Asuntu ASEAN, Milena Rangel informa, PM Xanana ninia vizita iha Malazia susesu.
Nia dehan, PM Xanana hasoru-malu ho Primeiru Ministru Malazia, Anuar Ibrahim, hodi koalia kona-ba oinsa atu servisu hamutuk iha tinan 2025 hodi prepara Timor-Leste nia adezaun ba ASEAN.
"Primeiru Ministru nia vizita daudauk iha Malazia susesu tebtebes. Ita hetan apoiu masimu husi Governu Malazia, liu-liu husi Primeiru Ministru, Anur Ibrahim,” dehan Vise Ministra ne’e bainhira akompaña PM Xanana fila mai Timor-Leste, iha Aeroportu Komoro, Dili, Tersa (03/12).
Maske hetan apoiu, maibé nia dehan, Timor-Leste tenke esforsu hodi bele priense kriteria sira adezaun nian.
“Iha buat lubuk ida hanesan kolega media sira sempre akompaña kona-ba roteiru iha kriteria hitu mak iha ne’ebá, maibé bele hatete katak atinje progresu pozitivu lubuk ida.”
"Maibé iha balun iha ne’ebá mak presiza ita tenkeser haree didi'ak fali, liu-liu ba iha akordu ekonómiku sira, tanba ne'e Ministériu Negósiu Estranjeiru ne'ebé ke kordena hela ita-nia prosesu adezaun hala'o serbisu ho Ministériu husi parte ekonómia nian hotu," katak nia.
Nune’e, nia hatutan, Ministru Koordenadór Assuntu Ekonómiku fulan-fulan hasoru malu hodi atualiza ba malu, liu-liu ba prosesu adezaun ba ASEAN nian ho Ministru sira seluk.
"Ami prepara hela haree didi'ak akordu sira ne'ebé ke presiza halo negosiasaun ho membru sira, ne'ebé ita iha hela prosesu atu finaliza asuntu tekniku balun antes to'o ba Sekretáriadu ASEAN nian iha Jakarta, no depois sei partilia ho señóra membru sira par depois fasilita ita-nia negosiasaun entre tekniku sira par bele asegura," katak nia.
Se buat hotu-hotu la'o di'ak, nia dehan, tinan 2025 TL sai ona membru plenu.
“Maibé husik ba estadu membru sira mak haree maibé Timor-Leste mós hakarak Timor nia integrasaun rejionál ne'e prepara halo didi'ak envolve setór privadu sira, envolve sosiedade sivil, universitariu no mós media sira rasik par atu apar mós ho prosesu integrasaun rejionál,” nia dehan.
Entretantu, Primeiru Ministru, Kay Rala Xanana Gusmão hatete, hanesan publiku rona ona katak daudaun ne'e TL prepara aan hela atu sai membru ba ASEAN.
“Dala-ruma bele husu ba malu tanba sa mak la sa'e ona, tanba sa mak la tama de'it no la asina hela de'it buat sira ne'e hotu, mais iha buat barak no área barak atu trata,” dehan nia.
PM Xanana afirma, atu adere ba ASEAN la’os ba asina de’it maibé tenke priense kriteria ne’ebé iha, hanesan mós bainhira TL atu sai membru Organizasaun Mundiál Komersiu.
