PJR Afonso hatete, keixa husi Xefe Estadu hasoru SEATOU ne’e tama ona, maibé presiza halo lai verifikasaun ba keixa refere.
"Keixa PR Horta ligadu ho SEATOU nia asaun ba negósiante sira ida ne'e tama ona, maibé ida ne'e ita presiza verifika lai," dehan Prokurador Alfonso ba jornalista sira hafoin partisipa aniversáriu Komisaun Anti Korrupsaun, iha Farol, Dili, Sesta (21/02).
Nia afirma, keixa husi PR Horta tama ona tuir odamatan nune’e presiza verifika didi’ak keixa refere.
“Kuandu keixa ne'e tama prezia iha avaliasaun husi Prokurador returnu hodi delega ba orgaun investigador sira,” nia hatutan.
Molok ne’e, Prezidente Repúblika, José Ramos Horta informa, nia hato’o keixa ba Ministériu Públiku kontra Sekretariu Estadu Asuntu Toponomia no Organizasaun Urbanada, Germano Santa Brites Dias, tanba konsidera asaun ne’ebé Sekretariu Estadu ne’e halo viola lei.
PR Horta hatete, nia hamutuk ho Provedór Direitus Humanus no Justisa (PDHJ) hato’o ona keixa hasoru SEATOU.
“Sim, ha'u aprezenta duni, ha'u aprezenta (keixa) dala rua ba PJR, hamutuk ho PDHJ,” dehan Xefe Estadu ne’e ba jornalista sira hafoin partisipa selebrasaun tinan foun Lunar, iha salaun Multiuzus-GMN, Bebora, Sesta (17/01).
Konteudu husi keixa ne’e, PR Horta husu ba Prokuradór Jeral Repúblik (PJR) atu haree didi’ak kompetensia legal husi SEATOU ba eviksaun ne’ebé nia hala’o.
“Sim, buat ne'ebé, primeiro haree didi'ak buat ne'e laos kompeténsia legál Sekretáriu Estadu Asuntu Toponímia no Organizasaun Urbana nian. Haree didi'ak lei, nia (SEATOU) lee didi'ak lei, ne'e lá'os nia kompeténsia, nia vióla ona lei, governu vióla ona lei, ne'e lá'os nia papél,” dehan Horta.
PR Horta hatete, hotu-hotu konkorda katak sidadaun sira labele okupa illegal ba fatin ne’ebé estadu presiza. Maibé, labele halo fali diskriminasaun.
“Balun haree iha Metiaut ne'e okupa, entaun la book ida, maibé book fali ema sira ne'ebé kiak ne'e”.
Tan ne’e, Xefe Estadu ne’e husu ba governu atu tenke fó duni kompensasaun ba komunidade sira ne’ebé afetadu.
Aleinde ne’e, PR Horta hato’o mós ninia lamentasaun ba envolvimentu Forsa Armada iha eviksaun.
“Ha'u la konkorda mak lori Forsa Armada, entaun signifika la konfia polísia, entaun buat oan nune'e tenke lori Forsa Armada, la lori polísia, entaun buat ruma boot liu fali lori saida? Purtantu, Forsa Armada, Forsa Armada nia fatin, polísia, polísia nia fatin lalika kahur demais buat rua ne'e, se la'e buat hotu-hotu polísia-militár tenke tama,” dehan nia.
