Prokurador Jerál Distrital Dili, Jacinto Babo informa, Ministériu Públiku (MP) delega ona Polisia Sientifika Investigasaun Kriminal (PSIK) hodi halo investigasaun klean ba kazu Padre Abito ninia mate.
“Iha semana kotuk ita haruka ona PSIK atu halo investigasaun tuir prosesu normal, kontinua buka dadus, hafoin remata iha ona konkluzaun mak ita dehan kazu Padre Abito mate iha inidikasaun ba krime ka lae,” dehan Jacinto ba jornalista Jornal INDEPENDENTE via telefone, Kuarta (05/10).
Kona-ba rezultadu autopsia ba mate-isin Padre Abito, prokuradór ne’e dehan, rezultadu autopsia ne’e so tribunal mak iha kompetensia atu pronusia.
“Rezultadu autopsia ne’e buat ketak ida… ida ne’e segredu, tribunal de’it mak bele hatene atu foti desizaun,” dehan nia.
Entretantu, iha fulan Agostu nia laran, PSIK konsege konklui ona investigasaun inisiu no simu ona mós rezultadu autopsia husi Departamentu Forensik, Hospital Nasionál Guido Valadares (HNGV).
Bazeia ba dadus hirak ne’e, PSIK halo ona auto-notisia no submete ba Ministériu Públiku hodi hein prosesu tuir mai.
“Sasin balun ami hahú bolu hodi notifika sira no ami rona informasaun sira ne’e hanesan inisiál de’it, ba hirak ne’ebé mak antes akontesimentu no depois akontesimentu hatene informasaun ruma, ami rekoila tiha informasaun sira ne’e, tanba ne’e, informasaun báziku ne’e mak ami tau iha auto-notísia hodi submete ba iha Ministériu Públiku,” informa Portavoz Invetigador PSIK, Octávio da Costa Araújo ba jornalista sira iha nia knar-fatin, Kaikoli, Kuarta (31/08).
Octavio esplika, PSIK nia devér no obrigasaun mak submete ona prosesu ba MP no hein de’it delegasaun kompetensia husi MP atu halo investigasaun klean.
“Ami-nia dever, obrigasaun, ba rekolla dadus hotu tenke sumbete ba Ministériu Públiku mak foti desizaun atu delega kompetensia atu halo invetigasuan klean ba kazu Padre Abito nia mate, ne’e depende ba PJR atu delega ba autoridade invetigador hanesan ami, PSIK, ba iha Instituisaun Polisia sira seluk, tanba ne’e ita hotu hein,” katak nia
Hatan kona-ba bazeia ba rezultadu autopsia no rezultadu investigasaun inisiu karik iha indisiu ba krime iha kazu Padre Abito nia mate, nia hatan, katak kestaun ida ne’e seidauk bele fó sai ba públiku no rai ba segredu justisa.
“Dadus informasaun husi testamuña balun iha fatin akontesimentu no pasajeiru MSR ne’ebé lao hamutuk Padre Abito molok mate, ami rekolla no rona hanesan informasaun inisiál, sai hanesan dokumentu ida, iha semana kotuk ami submete tiha ona prosesu ne’e hotu ba iha prokuradór, ita hein de’it rezultadu,” nia afirma.
Iha 22 Agostu, tuku 08.30 kalan, mosu notisia triste ida ba sarani Katolika iha Timor-Leste. Padre ida iis kotu bainhira tula hela feto ida ho intensaun atu ba haan iha restaurante ida iha Dare.
Tuir informasaun, iha Segunda kalan, Padre Abito José Carmeno Brites, haruka mensajen ba feto ida ho inisial MSR, atu ba haan ho nia iha restaurante ida iha Dare.
MSR aseita ho konvite husi Padre Abito no sira na’in rua uza motor marka Jupiter ho xapa matrikula E.8081, aranka Dare. Padre Abito mak kondus motor ne’e.
Maibé iha dalan klaran tanba rai nakukun ona, Padre Abito ho MSR deside hodi fila mai Dili.
“Sira na’in rua fila fali mai to’o iha dalan foun husi Dare nia tuun mai liu husi Mahoka nia uma leten ne’e mak halai sees, entaun soke penahan no sira monu ba baleta kuak. Sira na’in rua uza kapasete dala-ruma kapasete la metin, entaun kapasete semo sai, baku ulun ba troatoar balun iha ne’eba, entaun iha ne’e mak pandaka maka’as,” informa Xefe Seksaun Polisia Tranzitu Munisipiu Dili, Inspetor Domingos Sarmento Gama, iha Komando PNTL Dili, Kaikoli, Tersa (23/08).
Iha asidente ne’e, nia dehan, Padre Abito sofre kanek grave iha ulun, enkuantu MSR sofre kanek kaman.
Hafoin asidente ne’e, nia hatete, konsege evakua Padre ho MSR ba Hospital Nasionál Guido Valadares, maibé Doutor sira la konsege salva padre nia vida.
Ba MSR, nia hatete, daudauk ne’e fila ona ba nia rezidensia no parte investigadór to’o ona iha MSR nia uma maibé tanba sei sente moras nune’e seidauk bele tuir prosesu investigasaun.
“Ita husu nafatin (MSR) sei apresenta an par depois ita foti deklarasaun, maibé ita mós la taka dalan, karik iha momentu asidente iha sasin ruma mak haree karik atu aprezeta hodi nune’e ita foti mós deklarasaun par kompleta kona-ba asidente refere," nia hatete.
