Iha 29 Jullu tinan ne’e, Ministru Finansas, Rui Gomes, asina ona akordu ho reprezentante Banku Mundial iha Timor-Leste, Bernard Harbone, kona-ba emprestimu tokon $121 ne’ebé sei utiliza hodi finansia projetu bee-moos iha zona Leste kapital Dili.
Tuir governu nia kalkulu, projetu bee-moos iha zona Leste ne’e sei benefisia populasaun hamutuk na’in 82.380 liu husi konesaun bee ba uma sira no monta kontador hamutuk 12.482.
Hafoin ida ne’e, iha 05 Outubru ne’e, Konsellu Ministru foti hikas desizaun hodi empresta tan tokon $127 husi Banku Dezenvolvimentu Aziatiku (Asian Development Bank—ADB).
Ministru Prezidensia Konsellu Ministru, Fidelis Leite Magalhaes informa, Konsellu Ministru (KM) delibera hodi autoriza Ministru Finansas, Rui Agosto Gomes atu selebra akordu finansimentu ho Banku Dezenvolvimentu Aziatiku (Asian Development Bank—ADB).
Fidelis hatete, governu sei halo emprestimu rua; ida ho natureza regular ho valor osan tokon $50 ho periodu tinan 17 no ida seluk ho natureza konsensional ho valor osan tokon $77 ho periodu tinan 20.
Emprestimu ne’e, nia dehan, atu finansia projetu fornesimentu bee-moos iha zona Oeste munisipiu Dili.
“Orsamentu ne'ebé governu sei empresta husi Banku Dezenvolvimentu Aziatiku ho objetivu atu finansia projetu fornesimentu bee-moos ba komunidade sira ne'ebé hela iha Dili zona Oeste nian.”
“Komponente rua ne'e ba objetivu ida. Rua ne'e tau ketak-ketak tanba ninia modelu finansiamentu mak ketak-ketak, nia fonte mak ADB, governu liu husi Ministériu Finansas sei asina akordu ne'e hodi finansia projetu bee,” informa Fidelis hafoin enkontru Konsellu Ministru iha Palasiu Governu, Kuarta (05/10).
Molok ne’e, Ministru Finansas, Rui Gomes, hafoin asina akordu emprestimu ho Banku Mundial hatete, osan emprestimu husi Banku Mundial ho montante tokon $121 ne’e sei uza hodi dezenvolve, hadi’ak no espande sistema bee-moos iha kapital Dili parte Leste.
Nia dehan, problema bee-moos iha kapital Dili boot tebes no hetok komplesu liu tan númeru populasaun ne’ebé aumenta kada tinan lalais liu fali taxa kresimentu disponibilidade servisu.
Ministru ne’e hatutan, kuaze 1/3 husi populasaun Timor-Leste konsentra iha Dili no ida ne'e halo rekursu bee hetok limitadu.
“Ita hotu hatene katak Kapital Dili enfrenta hela dezafiu oioin iha area sosial no ambiental. Purezemplu, husi ema na’in lima, ema na’in tolu mak laiha asesu ba bee-moos; Inan-feto no labarik barak mak lakon tempu ba kuru bee, situasaun ne'e obriga labarik sira labele ba eskola no lakon oportunidade ba edukasaun. Ida ne’e akontese tinan barak ona,” dehan Ministru Rui.
Tanba ne'e, nia afirma, akordu emprestimu millaun $121 ne’e nu’udar esforsu ida atu responde ba problema ne’ebé Kapital Dili enfrenta hela, liu-liu iha parte Leste.
Projetu ba bee-moos iha zona leste ne’e, nia informa, sei hahú iha fulan Outubru tinan ne’e ho durante tempu tinan hitu (7).
