Ministru Salvador hatete, trabaladór na’in 5 ne’e hasai ne’e pertensia ba jestaun kompaña Wartsila no laiha ligasaun ho jestaun governu nian.

Nia dehan, nu’udar kompaña internasional, kompaña Wartsila iha nia kodigu konduta rasik hodi regula nia traballador sira.

“Iha momentu ne’ebá ha’u konfirma katak sira sei iha kontratu ho see, ho MOP ka EDTL ka kompaña Wartsila? Horseik (Tersa, 21 Jullu), ha’u konvida ona ekipa Wartsila mai par bele esplika situasaun ida ne’e, maibé traballadór sira ne’e mós kontra buat lubuk ida,” dehan Ministru Salvadór.

Liu husi pajina Facebook, Ministru Obras Públikas. Arq. Salvador Eugénio Soares dos Reis Pires, fó sai kona-ba aktus funsionariu sira ne’ebé halo kompaña deside hasai sira.

Iha asuntu lima ne’ebé sita iha pajina facebook ne’e mak hanesan; 1). Falsifika lista prezensa no asinatura ba halo Konferènsia Imprensa; 2) Kontra protokolu Estadu Emerjènsia nian no pandèmia Covid-19; 3) Konvida GMNtv tama iha planta Sentràl Elètrika Hera sein koñesimentu husi Wartsila hanesan jerente ba Sentràl Elètrika Hera no Diresaun Jeràl EDTL nian; 4) Uza uniforme Wartsila nian ba Konferènsia Imprensa hodi husu kompensasaun ba MOP no ho sira-nia asaun afeita ba imajen no reputasaun Wartsila nian; 5) Iha kestaun atetudi no dssiplina traballadòr sira nian.

“Wartsila hanesan ajente ida ne’ebé mak halo kontratu ho governu, sira sente katak sira-nia reputasaun monu ho governu, no sira mós husu deskulpa ba governu ba ida ne’e,” dehan Salvador.

Nia afirma, MOP la mete politika jestaun rekusu umanu kompaña nian, tanba kompaña mós iha ninia poltika rekursu umanu rasik no kodigu konduta profisionalizmu ba sira-nia trablladór sira atu mantein sira-nia reputasaun hanesasan ajente negosiu ida ne’ebé mak presta hela serbisu ba governu.

“Ami-nia sujestaun ba iha Wartsila iha tempu ne’ebá atu haree ba iha sansaun disiplinar ruma ba iha aktu sira ne’e, maibé kompaña rejeita tanba sansaun (disiplinar) ne’e la tama ba iha kontratu kompaña nian ba staf sira, tanba ne’e kompaña sei halo avaliasaun no sei entrega ba iha rekursu umanu sentral iha Jakarta mak sei hasai desizaun.”

Ho nune’e, Salvadór dehan, nia hatete ba kompaña katak, “Ne’e depende ba iha ita-boot sira, maibé ami hato’o ami-nia preferensia mak fó netik sansaun ba sira, tanba sira-nia ezijensia ba ami ne’e fora husi ami-nia jestaun, maibé tama liu ba iha politika jestaun kompaña ninian.”

Tan ne’e, Ministru rekuza informasaun ne’ebé hatete Ministru mak fó presaun hodi hasai funsionariu na’in 5 ne’e.

“Informasaun ida ne’e la loos,” nia afirma.

Deskonfia Ministru Salvador Kongkalikong ho Kompaña

Entretantu, tuir informasaun husi reprezentante tekniku profisional ne’ebé kompaña Wartsila hasai, katak, sira ezije sira-nia direitu ba subsidiu tanba hafoin Prezidente Repúblika dekreta estadu emerjensia no governu hasai dekretu lei kona-ba instituisaun esensial sira atu nafatin serbisu hodi garante funsionamentu ba asuntu esensial ninian, EDTL mós tama iha parte esensial.

Ho nune’e, durante periodu estadu emerjensia funsionariu sira kontinua hala’o serbisu hodi garante katak eletrisidade ba konsumedór sira lakan nafatin.

Maibé, fonte ne’ebé lakohi públika ninia identidade ne’e dehan, bainhira kordena ho sira-nia Plant Manager no Xefe Departamentu, sira hatete katak, maske EDTL ne’e tama parte esensial maibé laiha direitu ba subsidiu.

Tanba ne’e, nia dehan, nia ho nia kolega sira hasoru-malu no hasai rezolusaun koletivu ida hodi hato’o sira-nia lamentasaun.

“Iha nasaun barak, ema ne’ebé sai husi nia uma ba serbisu iha tempu Covid-19, sei la fila ba uma no governu aluga otel par hela. Maibé, ami la ezije ida ne'e, ami nia ezijensia mak; Ekipamentu ba prevensaun Covid-19, hanesan hand sanitizer, luvas, no maskra, no ezije mós ami-nia direitu,” dehan nia.

Ezijensia ne’e, nia dehan, nia parte hato’o liu husi meius rua, ida dirize karta formal ba Ministru Obras Públika Salvador Pires, no rua, hato’o liu husi media.

“Depois de ida ne'e, ami hetan kedas resposta husi jerente sira no imidiatamente sira mai konvoka enkontru aberta ho ami, no sira hato’o katak Ministru hirus loos no haruka sira tenke pecat hotu kedas,” dehan fonte ne’e.

Maske nune’e, nia hatutan, sira-nia jerente husu ba sira atu husu deskulpa ba Ministru Salvador ba aktu ne’ebé sira halo ona.

Ho nune’e, liu loron ida, sira haruka karta formal hodi husu deskulpa ba Ministru Salvador no halo mós konferensia imprensa hodi hato’o sira-nia deskulpa.

“Ami hanoin, hafoin ami husu deskulpa, buat sira ne'e rezolvidu ona. Maibé lae, bainhira ami koko atu husu tuir ba ami-nia superior sira, sira dehan ‘ami esforsu maka'as ona atu konvense ministru nia desijaun atu labele hasai imi, maibe ministru nafatin fó presaun katak tenke hasai’,” fonte ne’e konta.

Ho presaun husi ministru ne’e, ikus mai, kompaña buka meius atu hasai sira, maibé tanba kompaña laiha razaun atu hasai, nune’e kompaña koko falsifika funsionariu na’in lima ne’e ninia valor dezempeñu.

“Kompaña laiha razaun atu hasai ami, entaun sira falsifika tiha ami-nia valor dezempeñu hodi sai hanesan evidensia ida ba kompaña atu bele hapara ami-nia kontratu.”

Ba avaliasaun dezempeñu, fonte ne’e hatete, durante serbisu, kompaña halo avaliasaun dezempeñu tinan ida dala rua.

“Fulan 6 liu ba kotuk ami hotu hetan valor di’ak hotu (meet expectation) i nune'e mós fulan 6 tuir mai ami nafatin hetan valor di’ak. Derrepente de’it ami haree ami-nia valor sira hatun tiha fali sai a'at hotu.”

“Tuir ami, sira hatu'un ami-nia valor dezempeñu la ho justu no la ho faktus, maibé ho vigansa atu atinze sira-nia objetivu,” dehan fonte ne’e.