Vise Primeiru Ministru MKAS-MDRHK, Mariano Assanami Sabino hatete, enkontru dala rua (2) ho Banku Mundiál atu deskute detaillu kona-ba asaun ne’ebé atu halo hamutuk, liu-liu kona-ba ba isu sentrál ba malnutrisaun no problema Stunting ne’ebé halo labarik krekas no badak.

"Ami enkontru ho Banku Mundiál ba dala rua nian atu deskute detaillu kona-ba asaun saida mak ita bele halo hamutuk entre Banku Mundiál, ADB nomós Ajênsia sira hanesan UN nian, Unicef no Wold Food Program (WFP) kona-ba isu sentrál ba malnutrisaun nomós problema Stunting labarik ne'ebé krekas no badak, ladun iha nutrisaun di'ak ka nutrisaun króniku ne'ebé mak ita nia nasaun hasoru," dehan Mariano Assanami Sabino hafoin reuniaun iha Gabinete VPM Palásiu Governu, (28/08).

Nia dehan, tanba dadus ne'ebé ke iha Timor-Leste iha 47% ba oan sira no ki'ikoan sira ne'ebé maka ho moras Stanting ka nutrisaun króniku ne'e dadus ikus liu ne'ebé iha uluk ki'ik mais agora ne'e boot tebtebes, tanba ne'e mak fó hela atensaun masimu ba ida ne'e.

"Ita nia atensaun sei ba bu'at rua ne'ebé mak bu'at balu ita atu hadia agora dadaun ADB investe hela no mós ita impresta mós Millenium Chalenge Coorpration (MCC) fó hela liu-liu kona-ba atu hadia bee moos iha Dili laran," nia salienta.

Tan ne'e mak investe ona bee iha Dili laran no mós Investe bee iha Manufahi, Vikeke, Lospalos mais iha de'it sidade seidauk to'o iha rurais, Governu hanoin katak BTL-EP mós sei esforsu para atu halo Serbisu ida ne'e.

Entaun serbisu ne'e integradu, edukasaun esforsu halo ninia serbisu hanesan merenda eskolar ho sira selseluk, husi parte Sosial halo hela bolsa da mae ho selseluk ne'ebé ke kontinua, parte saúde halo serbisu lubuk ida ne'ebé ke agora kampaña manas hela oinsá mak inan fó susu.

"Agora dadaun namanas hela para atu prepara orsamentu ba 2024, tanba ne'e mak ita tenke kosdena prográma, sinkroniza programa sira ne'e para Programa bele la'o di'ak, nu'udar Ministru Koordenador ba Asuntu Sosiais sei halo koordenasaun di'ak liu para bele halo asaun integradu, la'os de'it iha nível Ministerial, Ministerial sei halo koordenasaun sei iha mós nível tekniku nian ne'ebé mós sei iha koordenasaun no mós sei involve mós ajente sira ne'ebé mak ajensia ONU nian internasionáis no mós ONG lokál sira ne'ebé ita iha orsida ha'u sei ba ko'alia mós ho sira," nia akresenta.

Nia hatutan, para haree oinsá mak tenke tama ona iha planu integradu, labele ema ida-idak halo ninian maibé tenk organiza malu no Koordena malu kada Instituisaun no kada Ministerial tenke halo asaun hamutuk para haree ida ne'e.

Iha ne'e mós iha Konsellu Nasional Seguransa Soberania Alimentar Nutrisaun Timor-Leste (KONSANTIL) ne'ebé mak uluk iha Ministeriu Agrikultura no agora halo kordenasaun nafatin para oinsá ida ne'e la'o di'ak iha leten to'o kraik.

"Ita tenke halo koordenasaun di'ak ita tenke halo kordenasaun di'ak rezolve problema bee moos ne'ebé maka kleur tebtebes ona ita hasoru ida ne'e hotu mak Programa ida ne'e ohin ami deskute oinsá mak halo di'ak liu tan ba oin," tenik nia.

Iha fatin hanesan Country Reprezentative Banku Mundiál Iha Timor-Leste Bernard Harborne hatete hasoru malu Vise Primeiru Ministru no Ministru Koordenador Assuntu Sosiais no Ministru Dezenvolvimentu Rural Habitasaun Komunitaria nune'e bele aprezenta relatoriu husi Banku Mundiál ba vise hodi apar ho Programa sira iha nia área.

"Ohin ami ko'alia ho vise Primeiru Ministru kona-ba Relatoriu boot ida naran Kapitál Umanu no mós ko'alia kona-ba halo nusa relatoriu ne'e bele ajuda vise Primeiru Ministru no Ministru Koordenador Assuntu Sosiais nia serbisu," dehan nia.

Relatoriu ne'e haree kona-ba kona-ba área oin-oin de'it haree kona-ba Nutrisaun labarik nian no haree kona-ba Rekursus no mós haree serbisu ba Juventude. Depois relatoriu ne'e relatoriu ida ke  bele fó Ezemplu saida mak bele halo.

Ko'alia kona-ba área husi vise Primeiru Ministru nian mak kona-ba sosiál no kona-ba área rural relatoriu ne'e bele fó Ezemplu halo nusa mak vise Primeiru Ministru bele haree progresu ba área sira ne'e halo nusa mak atinje objetivu ninian.

"Iha relatoriu ne'e ami haree katak Timor agora tama iha krize Kapitál Umanu nian deside ita ukun aan progresu di'ak tebtebes tinan 10 ka 15 hanesan ne'e, mais agora ita haree katak sei iha difikuldade lubuk ida iha area ida ne'e," tenik nia.