Ministru Justisa Sérgio da Costa Hornai hatete, Servisu Ministériu Justisa nian mak atu hametin no priénse kualidade servisu ne'ebé hakarak ba iha tempu naruk.

Ministru Sergio dehan, iha prosesu rekrutamentu, iha ona diskusaun husi Ministru ho nia ekipa. Sira halo diskusaun kona-bá regulamentu sira atu nune’e ema atu servisu ba tinan naruk nian la iha impedementu ruma.

"Ohin, ita boot sira integra an ba Ministériu Justisa ka iha uma mahon bo’ot funsionáriu Funsaun Públika ninian iha ita nia Administrasaun estadu Repúblika ida ne'e, maske ita boot sira agora dadaun goja estatutu hanesan ajente administrasaun públika iha Ministeriu Justisa ninia" dehan Ministru iha Salaun MJ Kolmera, Tersa (04/02).

Iha fatin hanesan, Prezidente Komisaun Funsaun Públika (KFP) Agustinho Letêncio de Deus hato'o parabens ba empozadu sira tanba husi kandidatu 400 resin iha de'it na'in 74 mak pasa.

Prezidente ne’e dehan, prosesu ingressu ba administrasaun públika la’ós prosesu ida ne'ebé tur hodi eskola de'it, maibé prosesu ida ne'ebé iha aktus formal tuir lei sira.

"Kontenti mós hare ita boot sira iha fulan hira liu bá tur iha komputador oin ho oin bo’ot, maibé ohin bele kontenti no hamnasa tanba husi kandidatu rihun haat resin, ita boot sira mak di'ak liu husi sira seluk, ba ida ne'e parabens ba ita boot sira," katak Prezidente.

Nune’e mós, Agustinho Letêncio hatutan, empozadu sira servisu seidauk remata, servisu hahú ohin no sei simu lia-fuan aat sira tan ida ne'e mak imi nia servisu.

Enkuantu, Gurda Prisional ne'e sei koloka ba iha estabelesimentu prizaun Bekora, Suai no Gleno.

Entretantu, iha biban ne'ebé hanesan, Ministériu Justisa mós entrega Karo Selula Prizaun ba Estabelesimentu Prizaun Bekora, Suai no Gleno.