Prezidente Komisaun Asesu Ensinu Superiór (CAES), Maria Filomena Lay informa, husi totál estudante atmitidu na’in 5.749 ne'e, na'in 5.211 ba UNTL no na’in 538 ba IPB.
"Kandidatu ne'ebé mak asesu ba UNTL hamutuk 5.211 kompostu hosi feto iha 3.313 no mane iha 1.808. Ba Institutu Politékniku Betano, hamutuk 538 kompostu feto iha 276 no mane iha 262," dehan Maria, iha salaun MESSK, Kolmera, Sesta (31/01).
Nia dehan, rejime jerál iha 4887, rejime espesiál subrejime oportunidade iha 468, rejime espesiál subrejime oan veteranu iha 86, rejime espesiál subrejime hakbi'it iha 152, rejime espesiál subrejime maiór 23 anos iha na'in 11, Lisensiadu iha 15, Eskola Internasionál sira iha Timor-Leste iha tolu, Polísia Nasionál Timor Lorosa'e iha 17, F-FDTL iha 39, defisiénsia iha 25 no rezidénsia munisípiu 46.
Nia esplika, kandidatu sira husi Kategoria veteranu no mártír nia-oan ne'ebé la iha kolokasaun (la admitidu) ba Ensinu Superiór Públíku hamutuk 59. Nune'e mós ba kategoria hakbi'it fó biban ba ema kbi'it laek sira, ho nia rezultadu finál mak totál husi kandidatu sira hamutuk 389. Kandidatu sira ne'ebé tuir ezame hamutuk 363, kandidatu sira neʼebé la tuir ezame hamutuk 26. Kandidatu sira neʼebé admitidu ba UNTL no IPB hamutuk 152, husi númeru ida-ne'e, 122 ba UNTL no 30.
Ba IPB, nia dehan kandidatu sira husi kategoria Hakbi'it ne'ebé la admitidu ba Ensinu Superiór Públiku hamutuk 211. Kategoria Maior 23 Anos, ne'ebé fó biban ba ema ho tinan boot liu 23 ba leten, ho nia rezultadu finál mak totál husi Kandidatu sira hamutuk 14. Kandidatu sira ne'ebé tuir Ezame iha de'it 11, kandidatu sira ne'ebé la tuir Ezame iha tolu.
"Kandidatu sira ne'ebé admitidu ba UNTL no IPB iha 11, husi númeru ida-ne'e, 10 ba UNTL no ida ba IPB", nia informa.
Nia hatutan, kategoria eskola internasionál iha Timor-Leste fó biban ba kandidatu sira ne'ebé remata ona eskola internasionál iha Timor-Leste ho nia rezultadu finál mak totál husi Kandidatu sira na'in tolu. Nune'e kandidatu sira ne'ebé admitidu ba UNTL hamutuk na'in tolu.
Kategoria Falintil-Forsa Defesa Timor Leste (F-FDTL) fó biban ba kandidatu sira husi Instituisaun F-FDTL hodi kontinua estudu iha nivel ensinu superiór. Ho rezultadu finál mak totál husi kandidatu sira 82. Agora kandidatu sira neʼebé admitidu ba UNTL iha 39, kategoria PNTL ne'ebé fó biban ba kandidatu sira husi Instituisaun PNTL hodi kontinua estudu iha nivel ensinu superiór ho nia rezultadu finál mak totál husi Kandidatu sira hamutuk 17, ne'e ba asesu iha UNTL.
Maria Filomena, hatete kategoria defisiénsia fó biban ba kandidatu sira ho kondisaun espesiál hodi kontinua estudu iha nivel ensinu superiór hamutuk 30. Hosi ne'e kandidatu sira ne'ebé admitidu ba UNTL iha 25.
Kategoria rezidénsia fó biban ba kandidatu sira neʼebé rezidénsia besik iha munisípiu Manufahi hodi asesu ba IPB Betano mak Aileu, Ainaro, Covalima, Manututo, Viqueque. Totál husi kandidatu sira iha 46, no númeru ida ne'e asesu ba IPB.
Kategoria lisensiadu ne'ebé fó biban ba kandidatu sira ne'ebé remata ona kursu iha nivel Ensinu Superiór maibé hakarak foti fali kursu seluk mak hamutuk 24. Nune'e kandidatu sira ne'ebé admitidu ba UNTL iha na'in 15.
Ministru Ensinu Superiór Siénsia no Kultura, José Honório, hatete rezultadu asesu ba ensinu superiór rua ne'e rigór tanba envolve liña ministeriál sira.
"Ha'u hakarak dehan rezultadu ne'e rigór tebes tanba ita-nia ensinu superiór rua ne'e mak instituisaun públiku tanba ne'e ita-nia Komisaun CAES halo ho rigór no ohin ita fó sai rezultadu", nia dehan.
Ministériu Ensinu Superiór, Siénsia no Kultura informa katak rezultadu finál, hanesan lista ho naran kandidatu sira ne'ebé "Admitidu", sei divulga liuhusi Website hanesan Website Ministériu Ensinu Superior, Siénsia no Kultura (http://mescc.gov.tl/); Website Universidade Nacional Timor Lorosa'e (http://www.untl.edu.tl/); Pájina Facebook MESCC; Pájina Facebook UNTL no Pájina Facebook IPB.
