Ministru dehan, feto iha mundu barak mak iha ona pozisaun tanba servisu maka’as, no iha Timór mós Prezidente Parlamentu Nasionál (PPN) feto mak lidera, no barak mak toma pozisaun ministra tan ne’e hatudu ba mundu katak feto Timór mós bele.
Tanba ne’e husu ba feto ne’ebé hetan ona servisu tenki uza oportunidade ne’e ho di’ak no buka atu aprende halo barak, maibé dalaruma feto mós ladún utiliza oportunidade ne’ebé iha liliu ba jerasaun foun sira.
“Feto nia servisu todan tebes, servisu luta oinsá mak atu susesu família, kereira, servisu fatin, tanba feto nia responsabilidade boot tebes, no feto mós hetan oportunidade barak tebes, dalaruma imi feto mak ladún hatene utiliza oportunidade ne’ebé iha liliu ba jerasaun foun sira,” dehan Ministru iha Suai Room Timor-Plaza, Kinta (07/02).
Governante ne’e husu ba joven feto sira, hahú ohin tenki halo reflesaun ba ema hotu-hotu, atu hatene istória pasadu sira ne’ebé mak akontese ba kotuk, tan ne’e ba oin tenki buka hatene saida mak atu akontese iha futuru tanba ne’e importante tebes liliu iha TL.
Governante esplika, TL nasaun ki'ik, maibé atu halo nasaun ne’e boot iha ema ida-idak nia liman liliu ba feto sira atu utiliza oportunidade ne’ebé iha, ba sira ne’ebé hetan oportunidade servisu luta aprende tan ho nune’e bele hakat oin tanba kada tinan, oras no minutu idade mós la’o nafatin ba oin no keta haluha tempu nunka atu fila ba kotuk.
“Ohin imi la aprende buat ida ohin nian, ema seluk aprende dala sanulu ona, aban imi la aprende tan buat ida ema aprende tiha buat 20 ona, ne’e ita sei lakon barak, tan ne’e liliu ba alin feto sira sei iha aportunidade atu servisu buka aprende didi’ak, no aprende husi buat ki’ik, bainhira imi toman ona aban bairua imi sai lideransa ida ne’ebé hatene buka hatene lidera no hatene buat barak,” nia esplika.
Governante ne’e hato’o, Parebens ba feto hotu-hotu, ba susesu tomak luta nafatin ba, hakarak ba oin labele hein ema seluk tenki esforsu an, tenki hatene utiliza oportunidade ne’ebé iha hodi bele dezenvolve an, lalika hein ema seluk atu dezenvolve maibe buka rasik ho nune’e bele sai rikusoin ida ba estadu Timor.
Iha fatin hanesan, Diretora Nasional Relasaun-Públika no Komunikasaun, Maria Filomena Babo Martins hatete, objetivu selebra loron mundial feto ne’e atu haklaken ba mundu tomak ejisténsia feto nia ho kapasidade no enerjia tomak suporta malu hodi bele atinji igualdade jéneru.
“Tuir norma jéneru katak feto labele halo servisu ne’ebé mane halo feto TL tenki hatudu ba mundu katak feto mós bele, feto bele halo servisu mane ne’ebé mane halo,” Diretóra hakotu.