Diretór Nasional Agrikultura no Hortikultura, Lucio Romeo Ribeiro hateten, fulan Jullu to'o Agosto tinan 2024, Governu liu husi MAPPF sei sosa tan trator unidade 25 hodi distribui ba munisipiu sira ne'ebe seidauk hetan trator.
"Governu liu husi MAPPF preve orsamentu montante $85 mill hodi sosa tan trator unidade 25 ho nia ekipamentus sira. Ida ne’e atu kompleta numeru trator hodi halai natar iha munisipiu sira," informa Lucio Romeo Ribeiro ba Jornalista INDEPENDENTE iha nia knaar fatin, Komoro, (05/03)
MAPPF mós sei sosa kombustivel hodi oferese gratuita ba natar na’in sira, tanba politika governu nia apoiu gratuita trator,fini, kombustivel no adubu ba agrikultor sira hodi nune’e bele hasa'e produsaun iha rai laran.
Tinan ida ne'e, Diresaun Nasional Agrikultura no Hortikultura preve orsamentu montante $200 mill, agora proposta tama hotu ona hodi hein kompania ida ne'ebe kompete manan depois hatama proposta hodi distribui konbistivel ba munisipiu sira.
Kompania seidauk hatene tanbá proposta foin submete ba Parlamentu Nasional, depois prosesu aproximamentu iha Dili no hetan kompania manan na'in mak sei distribuisaun ba munisipiu hotu-hotu.
Governu liu husi Ministeriu Agrikultura ho Pekuaria Peska no Floresta (MAPPF) liu husi Diresaun Nasional Agrikultura no Hortikultura mak halo direitamente aktividade hamutuk natar na'in sira hodi hasa'e produsaun iha rai laran.
Governu apoiu orsamentu osan ba subsidiu sira hanesan fini , mina ho trator gratuita ba apoiu ba natar na'in sira ho insesitivu intesionista sira maibé governu apoiu orsamentu ho montante $1.5 milloens.
Distribuisaun ona trator ba Munisipiu tolu, maibé semana ida ne'e Ministeriu Agrikultura ho Pekuaria Peska no Floresta (MAPPF) sei entrega ba Prezidente Autoridade Munisipiu Covalima trator unidade 5, depois semana oin sei ba entrega trator unidade 4 iha munisipiu Baucau 3 liu ba Vikeke trator unidade 4 no Likisa trator unidade 1, Manufahi trator unidade 4.
DNAH husu ba natar na'in sira tanbá subsidiu sira ne'e husi governu mak distribui konbistivel, trator,fini, no seluk tan agrikultor sira iha responsabilidade ba subsidiu sira ne'ebé hetan.
Iha interese bo'ot ba sira bele halo natar no to'os hodi nune'e bele garante hasa'e produsaun iha rai laran, Governu halo investimentu ho subsidiu hotu no Rekursu Umanu tur ba natar, to'os laiha nafatin atu hasa'e produsaun.
