Tuir Ministru Victor, mina iha Bayu-Undan la'ós maran, maibé la viavel ona atu produs nafatin.

"Kona-ba mina Bayu Undan maran ne'e ha'u hanoin ida ne'e mós ami ko'alia ho Xefe Estadu bainhira tama ona iha faze ida ne'ebé labele halo produsaun tanba la ekonómiku ona la'ós maran, signfika mina mak la viavel ona atu produs nafatin, mina iha nafatin so que ninia kustu produsaun ne'e as liu fali husi komersiál entaun tenke hapara," dehan nia hafoin enkontru ho Prezidente Repúblika, José Ramos Horta, iha Palasiu Prezidensiál Bairu-Pite, Tersa (21/06).

Maske mina iha Bayu-Undan la viavel ona, maibé nia dehan, iha projetu seluk ne’ebé bele hala’o hodi kontinua fó reseita ba estadu.

“Iha mós projetu seluk ida bolu CCS (Carbon Capture Storage) ne'ebé agora daudaun ANPM ho Santos halo ona estudu viabilidade, estudu ne'ebé klean atu nune'e futuru mai bele kontinua nafatin halo reseita nafatin ba estadu,” dehan nia.

Kona-ba enkontru ho PR Horta, nia hatete, PR konvida MPM atu atualiza programa no atividade kona-ba petroleu, gás no minerál.

“Prezidente Repúblika iha duvidas lubuk ida ne'ebé nia koloka no halo diskusaun kapás, produtivu tebtebes, konsege konvense Xefe Estadu ninia dúvida, Xefe Estadu mós satisfeitu ba ba diskusaun ida ne'e.”

Aleinde ne'e, nia dehan, iha enkontru refere ko'alia mós kona-ba negosiasaun Greater Sunrise.

“Hotu-hotu akompaña katak iha tinan rua ikus ne'e negosiasaun entre Timor-Leste ho Austrália hetan progressu ida ne'ebé kapás tebes, entendimentu di'ak, submete ona dokumentu kona-ba kodigu petroliferu, depois dokumentu kontratu partilla produsaun ho mós fiskal rejime, dokumentu sira seluk lubuk ida ne'ebé governu rua konkorda hatun ona ba konsorsiu Greater Sunrise atu sira bele halo ánaliza no bele halo relasaun atu bele kalendáriu entre governu rua ne'e estebelese ona to'o fim do ano konklui dokumentu sira ne'e, atu asina dokumentu sira ne'e hotu, atu tama ba faze tuir mai, faze dezenvolvementu kampu.”

Molok ne’e, Prezidente Autoridade Nasionál Petroleu no Minerál (ANPM), Florentino Soares Fereira hatete, hela de'it fulan tolu mina iha kampu Bayu-Undan sei maran nune'e sei fó ameasa boot ba dezenvolvimentu, liu-liu dezenvolvementu nasaun ne'e nian iha futuru.

Tanba durante ne'e, nia dehan, estadu garante de'it reseita husi fundu petroliferu hodi tau iha orsamentu jerál estadu tinan-tinan atu halo dezenvolvimentu nasaun nian.

"Kitan para tiha ona iha 2005, agora Bayu Undan atu para iha tinan ida ne'e, se ita la esforsu tan ita sei la hetan reseita husi petroleum. Ita-boot sira hatene katak petroleu mak ita-nia fontes reseita unika iha pais atu bele sustenta ita-nia konstrusaun.”

“Ita iha fundu petroleu purvolta $20 billoens, uluk ita kontribui husi Bayu Undan kuaze $30 billoens, entaun ita gasta $12 billoens,” dehan nia.