Deputadu Bankada PD, Mariano Asssanami Sabino, kestiona governu seidauk rezolve bolseiru timoroan sira atu fila ba estuda iha Xina.
"Ita labele rezolve de'it problema ne'e, tanba sira hetan bolsu estudu husi Xina, maibé tanba Covid ne'e ita rasik mak organiza sira tama fali Nova Zelándia mai fali Timor," dehan nia, iha Parlamentu Nasionál, Segunda (20/6).
Assanami hateten, sira fila mai Timor-Leste, depois governu tenke fasilita sira atu fila ba Xina hodi kontinua nia estudu.
"Iha tempu ne'e fundu Covid iha, ita labele fasilita? Ita dehan laiha dalan no razaun oioin. Agora tenke buka dalan atu fasilita estudante sira ne'e ba estuda iha Xina," tenik nia.
Nia haktuir, Parlamentu Nasionál diskute orsamentu retifikativu ne'ebé tama mai, maibé realidade governu abandona hela alin sira ne'e fila ba eskola.
"Ha'u hanoin Fundu Dezenvolvimentu Kapitál Umanu (FDCH) tenke tau-matan mós tanba balun fó bolsu estudu husi osan minarai nian," tenik nia.
Nia subliña, maibé jestaun ba rekursu umanu ba estadu ne'e, Governu tenke tau-matan hotu atu sira remata estudu mós nia kapasidade ne'e util ba nasaun.
"Tanba lubuk ida remata ona estudu, uluk husi Ministériu Petróleu no Minerais haruka ba tiha li'ur, aprende atu kaer aviaun, depois mai ita la tau matan ba sira, maibé entaun sira ida-idak nia talentu, kapasidade, profisionál ne'e ita tenke util ba Estadu no nasaun," nia relata.
Nia fundamenta, tanba apoiu ba juventude ne'e importante, maibé fó nafatin konsensionaliza ba sira katak sira mak iha responsabilidade no sira mak hodi nasaun ne'e ba oin.
"Tanba ne'e konsentralizasaun ba aprende, ne'e nafatin importante," tenik nia.
Hataan ba ne'e, Ministru Asuntus Parlamentares no Komunikasaun Sosiál (MAPKomS), Francisco Martins da Costa Pereira Jerónimo hateten, relasaun estudante atu fila-fali ba Xina nia prosesu sei kontinua la'o.
"Ha'u hanoin iha tempu liu-ba diskusaun naruk tebes no prosesu la'o hela, maibé ita mós tenke ko'alia ho embaixada Xina hanusa mak posibilidade atu ba fila-fali ne'e," nia hateten.
Nia hateten, buat hotu tenke trata ho Governu Xina, tanba Governu Xina iha kritéria ne'ebé atu fila-fali, tanba sira mós agora Covid sei maka'as hela.
"Agora ita hakarak sira fila laiha Problema, tanba trata hela asuntu ne'e," tenik nia.
