Ministru Paixão hatete, Xefe Estadu Maior Jeral F-FDTL, Maijor Jeneral Lere orienta membru F-FDTL halo vizilansia iha rezidensia Angela Freitas ne’ebé mós nu’udar sede nasional grupu RNDJ-KRDTL tanba iha buatus balun katak grupu refere sei uza kilat iha sira-nia asaun hatuun Prezidente Repúblika Francisco Guterres Lú Olo.
“Imi (jornalista) hatene iha buatus balun sira atua ho kilat no dehan envolve F-FDTL ho PNTL, maibe ha’u fiar katak Jeneral Lere antisipa de’it no nia iha rauzaun, tanba ne’e nia mak sei esplika di’ak liu,” dehan ministru Paixão ba jornalista sira iha Parlamentu Nasional, Kinta (03/09).
Kona-ba preokupasaun katak F-FDTL ‘hada’u’ serbisu PNTL nian, Paixão rekoñese katak preokupasaun ne’e iha fatin, maibé tanba mosu issu katak iha kilat, nune’e F-FDTL mak halo intervensaun.
“Ida ne’e loos, maibé PNTL ne’e imi (jornalista) hatene iha tinan hirak ba kotuk akontese pistol ida-rua de’it mós ita haruka F-FDTL sira mak ba kaer hotu, apalagi kilat, no iha tinan 2006 no 2015 kazu señor Mauk Moruk iha pistol rua de’it ita haruka F-FDTL sira ba hotu, tanba ne’e mak ami tauk keta mosu tan fali kilat boot ruma iha ita-nia nasaun,” dehan nia.
Ho boatus kona-ba kilat no envolvimentu pesoal F-FDTL no PNTL iha grupu RNDJ-KRDTL, Paixão dehan, laiha problema bainhira Lere hola medidas.
“Jeneral Lere sei tetu atu hatan ba iha públiku, ha’u sei la halo esplikasaun ba ida ne’e, tanba politikamente governu laiha orientasaun ba iha militar, maibé bainhira mosu kazu artemarsiais ruma ita-nia F-FDTL sira sempre apoiu polisia atu serbisu hamutuk,” katak nia.
PNTL iha Koñesimentu
Iha fatin ketak, Komandante Jerál Polísia Nasionál Timor-Leste (PNTL) Komisariu Faustino da Costa hatete, PNTL iha koñesimentu ba prezensa membru F-FDTL iha Bairo Formoza, tanba dezde impase, militar sempre apoiu PNTL iha atividade balun.
“Ha’u hanoin ita dala-ruma ita ko’alia asuntu seluk ida, ne’e ha’u hanoin dala-barak ita tenta atu foti situasaun sira ne’e ba asuntu hotu-hotu. Ita atu dehan nune’e, dezde ita iha impase tinan kotuk ne’e militar dala-ruma sempre apoia PNTL, liu-liu iha atividade balun. Lei seguransa nasionál hatete, depois serbisu komplementár bainhira nesesita,” dehan Faustino ba jornalista sira, Kinta (03/09).
