Diretór Ezekutivu Fundasaun Mahein (FM), João Almeida hatete, movimentu militar iha sede RNDJ-KRDTL loloos labele akontese, tanba asuntu seguransa interna nu’udar kompetensia PNTL.

Maibé, bazeia ba informasaun balun ne’ebé públika katak, manifestante sira sei uza kilat iha asaun kontra PR Lú Olo, tanba ne’e nesesita duni prenza militar.

Tanba, bainhira iha kilat, ikus mai sei mosu krime no bele fó ameasa ba estadu.

“Estadu tenke medidas ida ho nesesariu, uza militar. Ita akompaña durante ne’e grupu husi Angela Freitas atu halo manifestasaun ne’e sira halo estetmentu ba iha publiku ho mós lia-fuan amesa, tanba ne’e bele mosu intervensaun ba kazu sira hanesan ne’e,” dehan nia.

Presaun ba Demokrasia

Estudante Universidade Dili (Undil) no Universidade Oriental Timor-Leste (Unital) konsidera prezensa F-FDTL iha rezidensia portavoz RNDJ-KRDTL Angela Freitas fó presaun ba demokrasia iha Timor-Leste.

Tuir estudante Fakuldade Siensia Politika, Undil, Leoniso Mariz hatete, kada sidadaun iha diretu manifesta sira-nia hanoin.

“Ha’u la ko’alia kona-bá saida mak Angela levanta, maibé ha’u ko’alia kona-bá intervensaun instituisaun F-FDTL ne’ebé mak diretamente fó presaun ba demokrasia nia ezistésia iha Timor-Leste,” dehan nia.

Nu’udar estudante, Leoniso dehan, haree katak iha indikasaun negativu ba vida demokrasia iha TL.

“Tanba depois ukun an ita hatuur ita-nia estadu ida ne’e ho naran klaru ona katak demokrasia mak nu’udar instrumentu ba ita atu la’o iha okos no moris iha okos nu’udar kultura ida ba ukun ida ne’e nian,” dehan Leoniso.

Estudante Unital, Fidelito dos Santos dehan, iha Konstituisaun RDTL garante povu atu manifesta sira-nia hanoin.

Hanesan estudante, nia dehan, la hamrik iha fileira ne’ebé de’it maibé hakarak atu hatuur loloos de’it demokrasia iha nia fatin.

“Labele ita uza nasaun ne’e sai hanesan republika demokratika maibé uza fali sistema ditadura,” dehan nia.