Diretór Ezekutivu SERVE, Florêncio Sanches hatete, durante ne’e iha kompañia internasionál no nasionál lubuk maka rejistu hodi loke investimentu iha rai laran, maibé iha kompañia barak maka laloos hodi mai rejistu iha SERVE.
Tanba ne’e, SERVE buka meius oinsá hodi haree sé loos mak sai hanesan na’in loloos ba kompañia hirak ne’e.
“Na’in loloos ba kompañia A, maibé na’in ba kompañia refere iha kortina kotuk. Ministériu maka sai fali na’in. Tuir loloos na’in ba kompañia maka mai hamriik iha oin hodi halo rejistu”, dehan nia, iha knaar fatin, Matadouru-Dili, horisehik.
Durante ne’e kompañia internasionál ho nasionál barak mak loke investimentu iha rai laran, maibé kompañia hirak ne’e mai rejistu iha SERVE la'ós na'in loloos. Iha fali ema husi ministériu balun maka aprezenta halo rejistu dehan sira maka na’in.
Ho problema hirak ne’e, SERVE promete iha futuru mai sei haree hodi identifika sé maka loloos na’in ba kompañia ida, Nune’e kuandu SERVE deteta sei foti asaun hodi hasoru.
Nia dehan, uluk SERVE implementa lei tuan katak kompañia ida bainhira rejistu tenke ho ninia administradór ne’ebé hela iha Timor. Maibé lei foun ne’ebé implementa evita kompañia ne’ebé rejistu atu hatudu reprezentante legál. Nune’e, bainhira ema ruma halo sala iha kompañia, reprezentante maka tenke responsabiliza.
“Iha Timor-Leste akontese ona iha ema balun reprezenta instituisaun Estadu mai iha SERVE rejistu kompañia internasionál, sira mak sai fali ba na'in”, tenik Florêncio.
Nia informa, ministériu ne’ebé durante ne’e koopera di’ak ho SERVE mak hanesan Ministériu Agrikultura no Peska (MAP), Ministériu Obras Públika (MOP) no Ministériu Turizmu (MT), maibé restu laiha kooperasaun.
Tanba ne’e, SERVE hakarak regula kompañia ne’ebé tama mai halo investimentu iha rai laran husu atu evita tau liafuan Timor-Leste iha sira nia kompañia.
Tuir dekretu lei 35/2012, artigu 37, fó duni dalan ba kompañia sé karik sira uza naran Timor-Leste iha kompañia, maibé kuandu sira halo krime ruma Estadu TL maka lori todan no halo naran fo'er. Tanba ne’e, ba futuru SERVE prevene ona atu naran Timor-Leste labele sai naran ba sira nia kompañia.
