Ministru Asuntu Parlamentares no Komunikasaun Sosial, Fransisco Martins da Costa Perreira Jeronimo iha sermonia asina akordu ne’e hatete, asina akordu koperasaun ho media nasional sira kona-ba publikasaun publissidade luta hasoru covid-19.
MAPKomS sei utiliza pajina sorin balun jornal nian, atu públika materia kona-ba planu vacina AstraZeneca covid-19, hodi hala’o sensibilizasaun ho diseminasaun informasaun covid-19 ba povu Timor-Leste.
Tuir Fransisco katak, koperasaun ne’e la’os atu kesi metin media sira atu halo tuir Governu nia hakarak, maibé hanesan halibur hamutuk forsa hodi luta hasoru covid-19 ne’ebé sai ameasa bo’ot ba ita nia populasaun tomak.
“Koperasaun ne’e la’os atu kesi metin media sira atu halo tuir governu nia hakarak”, dehan fransisco liu husi serimonia asina akordu iha sala reuniaun MAPCOMS, palasiu Governu.
Liu husi oportunidade ne’e, Ministru Fransisco mos dehan independénsia media kontinua hala’o nafatin, maibé iha momentu defisil ne’e mós Governu hakarak media iha nafatin sustentabilidade, hodi hala’o nia knar ho di’ak.
Entretantu, Diretór Suara Timor Lorosa’e, Salvadór J. Ximenes Soares hatoo agradese wa’in ba Governu liliu MAPKomS ne’ebé bele realiza koperasaun iha ambitu kontra surtu Covid-19.
Nia espera katak liuhusi koperasaun ne’e, media sira kontribui liutan hodi akompaña prosesu dezenvolvimentu ne’ebé Governu hala’o liliu hamutuk kontra surtu Covid-19.
Iha fatin hanesan, Diretór jornal Independente, José Sarito Amaral mós hatoo agradesimentu ba Governu liliu ba MAPKomS ba koperasaun ne’e.
Tuir nia katak, liuhusi koperasaun ida ne’e media imprime bele kontinua kontribui ba esforsu hotu-hotu ne’ebé Governu hala’o iha situasaun defisil surtu Covid-19.
Tanba tuir Diretór ne’e katak, papel media mós importante tebes atu hamutuk ho Governu kontra Covid-19 liuhusi informasaun sira, liliu planu Governu ba vasina AstraZeneca Covid-19.
Partisipa iha serimonia asina kooperasaun entre media STL, Ceo STL corp Salvador J.x Soares ho senoior manajer Bisnis Florençio de Oliveira, Diretora media Timor-Post Suzana Cardoso ho Diretor Media Independente José Sarito Amaral akompaña husi nia xefe departamentu publisidade Nunçia Fernanda Correia.
Jornalista: Adelaide Dos Santos
Editor: Jose Sarito Amaral
