Diretor Ezekutivu ADTL, Cesario da Silva hatete, apoiu husi Ministeriu Solidariedade Sosial no Inkluzaun (MSSI) nian dadauk ne’e iha ona ADTL.

“Apoiu fós saka 500 ne’e to’o horseik, nune’e komesa fahe ona ba ADTL nia membru sira,”dehan nia iha knar fatin Maskarenhas (13/04).

Nia hatutan, ADTL ho nia membru sira komesa identifika ona Ema ho Defisiensia ne’ebé afeita ba inundasaun no mós sira ne’ebé iha serka sanitaria no situasaun Covid-19 hodi prevene an labele sai.

Nune’e ADTL nafatin fó apoiu ba maluk defisiensia sira ne’ebé iha kapital Dili.

Aliende MSSI fó apoiu fós saka 500, iha mós mina kaixa 500 no ikan deho hamutuk 500 kaixa.

Entretanto, molok ne’e MSSI fó apoiu uluk ona fós saka 450 ba ADTL.

Ho nune’e ADTL ajuda ona ba Ema ho Defisiensia hamutuk na’in 800.

Tuir dadus iha Teritoriu laran tomak Ema ho Defisiensia hamutuk rihun  38.118.

Jornalista: Saturnina da Costa

Editor: Jose Sarito Amaral