Rezolusaun ba reativa reformadu ne’e tama iha ajenda ba reuniaun estra-ordinariu Konsellu Ministru iha 25 Setembru, horseik. Maibé KM la konsege deskute tanba MI retira rezolusaun refere.
Ministru Interior, Francisco da Costa Guterres infroma, nia parte retira rezolusaun refere tanba nia parte sei halo koordenasaun ho Komando Jeral Polisia Nasionál Timor-Leste hodi prepara kestaun salariu nian.
"Ohin ami retira tanba Komandu Jerál PNTL halo hela diskusaun ho ami, tanba ne'e ami sei avansa fali atu aprezenta rezolusaun ne'e ba Konsellu Ministru iha semana oin,” informa Francisco ba jornalista sira iha enkontru alargada Ministériu Interior, iha salaun Laline Larigutu, Komisaun Nasionál Eleisaun, Kaikoli, Dili, Segunda (25/09).
Francisco afirma, Komandu Jerál PNTL ho MI iha ona konkordansia atu prepara kestaun salariu.
“Se ita reativa tiha membru polísia reformadu na’in 158 tama fali servisu mak sira-nia salariu laiha, ida ne'e mós membru polísia sira sei hakilar fali Governu, tanba ne'e mak ami prepara hotu kondisaun lojistika hotu mak foin aprezenta rezolusaun ba iha Konsellu Ministru, aprova ita bele reativa sira tama fali servisu," dehan nia.
Hatan kona-ba baze legal ba Komando hodi halo reforma, nia dehan, lei ne'e kestaun seluk.
“Prosesu polísia reformadu sira atu tama fali servisu ne'e la'o la konforme lei, nia prosesu ne'e rasik to'o aprezentasaun ne'e. Maibé lei ne'e kontinua lei no rezolusaun ne'e sei temi kona-ba lei ne'e, agora nia prosesu ba iha ne'ebá mak laiha baze legal ida, tanba ne'e mak ita presiza baze legal ida mak bele rezolve problema ne'e."
"Rezolusaun ne'e aprova ita reativa membru PNTL reformadu na’in 158 tama fali servisu par ita submete ba prosesu sira ne'e hotu mak foin bele reforma fali sira. Tanba ne'e fulan Setembru hela loron lima atu remata ona, agora prosesu la'o hela, la presiza haklalak malu, tanba ne'e Komandu Jerál PNTL prepara hela lojistika sira ne'e hotu, hein atu reativa fali polísia reformadu na’in 158," katak nia.
Komisaun B Inisia Alterasaun ba Estatutu PNTL
Prezidente Komisaun B trata asuntu Negósiu Estranjeiru, Defeza no Seguransa, Domingos Augusto ‘Deker’ hatete, komisaun B sei uza ninia kompeténsia hodi inisia projetu alterasaun ba estatutu PNTL.
"Komisaun B rasik sei sai hanesan proponente par depois haree hadi'a lei ne'e. Iha kondisaun atu bele garante membru PNTL ida kuandu haree ba lei tinan to'o ona, hakarak ka lakohi tenke reforma," dehan nia iha PN, Segunda (25/09).
Daudaun ne’e, nia hatutan, komisaun B hala’o hela prosesu atu inisia alterasaun refere.
Komisaun sei haree tempu atu bele deskute, nune'e ba futuru bele fó garantia ba kualker membru sira ne'ebé atu ba reforma, inklui mós fó oportunidade hanesan ba membru foun sira.
Kona-ba polisia reformadu na'in 158 ne'ebé daudaun sai polémika, Deker hatete, governu la'os reativa maibé pendente de’it polisia hirak ne’e ninia tempu reforma hodi fó biban ba governu atu solusiona ninia prosesu administrasaun.
"Tuir informasaun ne'ebé ha'u hatene la'ós atu reativa, tenke kompriende koloka sasan ne'e, reativa ne'e signifika sira reforma no sai tiha ona mós tenke fila fali, la'e. Sei pendente hela, par depois atu rezolve problema administrasaun balun, i depois ikus mai sira nafatin reforma," katak nia.
